په کابل کې د جاپان سفارت او د ملګرو ملتونو د بشري بیا مېشتونې پروګرام (یو.اېن.هبیتات) ترمنځ د کابل ښار او په هرات کې زلزله ځپلو د ملاتړ په موخه د ۷ میلیونه ډالرو په ارزښت هوکړه لاسلیک شوه.
د دې هوکړې موخه د کابل ښاریانو او د هرات زلزله ځپلو سیمو د بنسټیزو تاسیساتو د بیارغونې له لارې، د بېوزلو د ژوند او چاپېریال ښه والی بللی شوی دی.
د آسیا او آرام سمندر لپاره د يو.اېن هبیتات ټاکل شوې استازې وایي، افغانستان په اوسنیو شرایطو کې له سخت بشري او اقتصادي بحران سره مخ دی او اړتیا ده چې د دغه هېواد د وګړو لاسنیوی وشي.
کازوکو ایشیګاکي د هوکړې لاسلیک پرمهال ویلي، په افغانستان کې تېرو څو لسیزو جګړو، اقلیمي بدلونونو او پرله پسې طبیعي پېښو د دغه هېواد ښاري او کلیوالې سیمې له سخت بشري بحران او اقتصادي ستونزو سره مخ کړې دي.
هغې زیاته کړې: « په افغانستان کې له ۲۰۲۱ کال وروسته او یا که په ښکاره ووایم، له هغې وروسته چې اسلامي امارت واک ته رسېدلی، بشري مرستې خورا مهمې او د ارزښت وړ دي. موږ هڅه کړې چې خلکو ته پر وخت بشري مرستې ورسوو. په هر حال، د افغانستان په ښاري سیمو کې بېوزله خلک ډېر دي او دا ډله خلک تر ډېره غیر رسمي ځایونو کې مېشت دي او اکثریت له بشري مرستو پاتې کېږي. له دې ټولو سره، په افغانستان کې طبیعي پېښو هم چې د اقلیمي بدلون مخامخ اغېزې ګڼل کېږي، ډېر خلک یې ځپلي دي.»
همدارنګه ایشیګاکي وايي، په افغانستان کې د بشري وضعیت د کابو کولو لپاره اړتیا ده چې له دې هېواد سره په پرله پسې ډول بشري مرستې وشي.
ورته مهال، په کابل کې د جاپان شارژدافېر تاکایوشي کورمایا وایي، هېواد یې هڅه کوي په افغانستان کې د بېوزله او اړمنو خلکو لاسنیوی وکړي.
د کورمایا په خبره، جاپان له افغانانو سره تل په سختو شرایطو کې ولاړ دی او خپلې ژمنې يې ورسره عملي کړې دي.
کورمایا زیاته کړې:« نن مو له یو.اېن هبیتات سره د همکاریو یوه داسې هوکړه لاسلیک کړه چې له مخې به یې د کابل ښاریانو او د هرات ولایت د زلزله ځپلو لاسنیوی او ورسره همکاري وشي. د دغې هوکړې له مخې به هغوی ته بنسټیز کارونه وشي، ترڅو د دوی پر ژوند مثبت اغېز ولري. د جاپان حکومت تل هڅه کړې چې له بېلابېلو لارو د افغانانو لاسنیوی وکړي.»
د جاپان سفارت او د یو.اېن هبیتات ترمنځ داسې مهال د بېوزلو لاسنیوي هوکړه لاسلیک کېږي، چې تېره ورځ د اقتصاد وزارت چارواکو له شمشاد سره په خبرو کې له نړیوالو بنسټونو او سازمانونو وغوښتل چې په افغانستان کې د بشري مرستو ترڅنګ په یو شمېر بنسټیزو پروژو کار وکړي، ترڅو د اړمنو افغانانو ستونزې په بنسټیز ډول حل شي.
