د کونړ ولایت نرنګ ولسوالۍ اړوند لامټک کلي کې د شنبې پر ورځ د شدید توپان او ورښت په پايله کې سېلابونه راوتلي چې له امله یې خلکو ته ځاني او مالي زیانونه اوښتي دي.
یو تن سېلاب ځپلی وايي: « د کور سامان، څاروي او هرڅه تر خټو لاندې دي. سېلابونو هرڅه رانه واخیستل.»
یو تن بل سېلاب ځپلی بیا وايي: « دلته سېلاب درانه مالي او ځاني زیانونه اړولي. ډېره زیاته ساحه او کورونه یې په بشپړه توګه ویجاړه کړې. یو شهید موږ په خپلو لاسونو له دې خټې را ویسته. د دې ځای ټول څاروي او مالداري یې ختمه کړه.»
د کونړ د طبیعي پېښو پر وړاندې مبارزې ریاست مسوولین وايي، د دغو سېلابونو له امله یو تن مړ او شپږ تنه نور ژوبل شوي دي.
دوی زیاتوي، د دغو سېلابونو په پايله کې د خلکو کورونه او کرنیزې ځمکې هم په بشپړ ډول ویجاړ شوي دي.
د کونړ ولایت د طبیعي پېښو پر وړاندې مبارزې ریاست د حوادثو آمر وايي: « دا ساحه تر کوړې سیمې پورې ټوله تخریب شوې، کورونه او هرڅه ویجاړ شوي دي. تر اوسه یو شهید او شپږ تنه ژوبل لرو او شاوخوا ۴۰۰ جریبه کرنیزه ځمکه ویجاړه شوې ده.»
په ورته وخت کې سېلاب ځپلې او زیانمنې شوې کورنۍ له سرپرست حکومته د بېړنیو مرستو غوښتنه کوي.
یوتن سېلاب ځپلی وايي: « له دولت غوښتنه کوو چې زموږ کورونه بېرته راته جوړ کړي او د اوسېدلو سامان راکړي.»
د سیمې یو اوسېدونکی وايي: «له دولت غوښتنه کوم چې له سېلاب ځپلو سره مالي مرستې وکړي. په اوږدمهاله کې غوښتنه کوو چې راتلونکي کې د دغه شان سېلابونو د مخنیوي لپاره دې ساحه کې یو چکډیم جوړ کړي ترڅو سېلابونه بیا ځل دغسې ورانی ونه کړي.»
له دې څو ورځې وړاندې هم د ننګرهار کوز کونړ او ښېوې ولسوالۍ کې د شدیدو ورښتونو او سېلابونو له امله خلکو ته د سر او مال زیانونه اوښتي وو.
