ملي دفاع وزارت: ژر به افغان سرتېري د پوځي زده کړو لپاره ترکیې ته ولاړ شي

د افغانستان ملي دفاع وزارت ویاند روح الله احمدزي له شمشاد سره د خبرو پر مهال وویل، ناټو سازمان د افغان ځواکونو روزنې او ملاتړ ته ژمن دي او ډېر ژر به یوه جوپه افغان سرتېري ترکیې ته د پوځي زده کړو لپاره ولېږي. 

احمدزی زیاتوي،ناټو سازمان،چې له ۲۰۱۴ زېږدیز کال راهیسې د افغان ځواکونو د روزنې او مشورې مسوولیت لري،له دې وروسته به د ترکیې هېواد کې افغان ځواکونو ته روزنه او مشوره ورکوي.

احمدزي زیاته کړه :« اوس نوې مرحله، چې زموږ ځواکونو لپاره له هېواده بهر د روزنې زمینه برابره کړې ده. د افغانستان امنیتي او دفاعي ځواکونه د دې لپاره بشپړ چمتوالی لري او موږ ترې هرکلی کوو او منندوی یې یو. » 

په ورته وخت کې احمدزی وايي، افغان ځواکونو ته به په درې پړاوونو کې پوځي روزنه ورکړل شي.

احمدزي زیاته کړه:«  دا پر درېیو برخو وېشل شوي،چې لنډمهاله، منځمهاله او اوږدمهاله دي. زموږ ځواکونه به  د تفاهم پر اساس په مشخصه توګه د بېلابېلو برخو د دغې روزنې لپاره له هېواد بهر استول کېږي.»

که څه هم د ناټو دغه اقدام چې د افغان ځواکونو روزنې، مشورې او ملاتړ دوام ورکوي، له هرکلي سره مخ شوی،خو د سیاسي چارو یو شمېر شنونکي پر حکومت نیوکې کوي،چې ولې یې په شلو کلونو موده کې خپلو سرتېرو ته د پوځي روزنې ورکولو ظرفیت جوړونه ونه کړه.

له دې وړاندې ترکیې د افغان پولیسو افسرانو ته په خپله خاوره کې روزنه ورکوله،خو دا لومړی ځل دی،چې د ناټو په چوکاټ کې د یاد سازمان دغه غړی هېواد په خپله خاوره کې افغان ځواکونو ته روزنه او مشوره ورکوي.