افغان ولسمشر محمد اشرف غني د زمري اوومې په مناسبت ارګ کې جوړې شوې غونډه کې د وینا پرمهال یو وار بیا طالبان وننګول چې ټول تمرکز یې پر ویجاړي، تاوتریخوالي او جګړې دی او که په دې فکر وي چې افغانان به ورته تسلیم شي، دا ناسم فکر دی.
که څه هم د طالبانو او افغان حکومت پلاوو د دوحې په تېره غونډه کې ومنله چې د افغانستان د ستونزې حل پوځي نه بلکې سیاسي دی، خو اوس یې دریځونه په جګړه ولاړ دي او داسې ښکاري چې خبرې اترې نوره پایله نه لري.
خو طالبانو بیا په تازه غبرګون کې خبرداری ورکړی دی، که د سولې لارې تړل کېږي او مقابل لوري له سوله ییزو پروسې ځان وکاږي، دوی حق لري چې د زور له لارې کار واخلي.
د طالبانو ویاند ذبیح الله مجاهد وايي: «که چېرې د سوله ییزې لارې پر وړاندې خنډونه ایجادیږي او توافقنامه نه عملي کېږي او موږ وینو چې مقابل جهت ځان باسي، له هغو سوله ییزو پروسو نه چې باید اجرا شوې وې او تر اوسه یې نتیجه ورکړې وه بیا نو زور او نظامي حل یوازینۍ هغه لار ده چې موږ ورته مجبور یو. دا زموږ حق دی، نه غواړو د افغانستان قضیه اوږده شي، د فلسطین موضوع ترې نه جوړو، دا باید ژر حل کړو، که چېرې سوله ییزې لارې وتړل شي او مقابل جهتونه د سولې پر وړاندې خنډونه اچوي امریکا هم د توافقنامې له متن سرغړونو ته دوام ورکړي، د زور او فشار له لارې حل ته موږ اماده یو. دا زموږ حق ده او دا د ملت د نجات لار ده.»
د سیاسي چارو تحلیل کوونکي وايي، امریکا یوازې اندېښې څرګندوي او تر اوسه پورې یې د افغانستان په قضیه کې مسوولانه چلند نه دی کړی.
د سیاسي چارو تحلیل کوونکی نازک میر زیارمل وايي:« امریکا د جګړې سټکرچر خپله ډیزاین کړی ده. د دوی له ضد او نقیض خبرو ښکاري چې دوی افغانستان کې د جګړې پای نه غواړي او نه هم مقتدره او ټولشموله حکومت غواړي.»
د سیاسي چارو تحلیل کوونکی اصغر خېل منګل وايي: «یوه تګلاره باید منطقه کې جوړه شي، د هغو وسله والو پر ضد چې افغانستان ته رالېږدول کېږي، په هغو ځایو بریدونه وشي، چې ترهګر په کې روزل کېږي، که دا کار ونه شي، د تروریزم لمن به ټولې نړۍ ته روسیې، هند چین ته وغځیږي. له ترهګرۍ سره باید کلکه مبارزه وشي.»
سولې ته د رسېدو لپاره نړیوالې او سیمه ییزې هڅې سر له اوسه ناکامۍ سره مخ دي او هغه فشارونه چې باید د جګړې پر اړخونو اچول شوي وای، نه محسوس کېږي، خو له هربل وخت افغان حکومت او طالبانو د جګړې دریځ کلک کړی او د سولې خبرې یې پر ټپه درولې دي.