افغان ولسمشر محمد اشرف غني نن ارګ کې د څارنې او همغږۍ ګډ بورډ په ځانګړې ناسته کې وویل، سوله یې لا هم لومړیتوب دی او له ثبات او سولې راتګ پرته سیمې ته سوله او کراري نه شي راتللی.
ولسمشر غني وویل،افغانستان ته له ثبات او سولې راتګ پرته سیمې ته ثبات نه راځي او نه به هم دلته اقتصادي او سوداګریز پرمختګ راشي.
غني زیاته کړې، افغانستان کې روانه جګړه د افغانانو ترمنځ نه ده او په خبره یې د ترهګرو ډلو او افغانانو ترمنځ جګړه ده،چې نړیوال باید د افغان حکومت تر څنګ ودرېږي.
هغه ټینګار وکړ،چې د سولې ملاتړی دی او په خبره یې د سولې لپاره یې د تر وخت مخکې ټاکنو وړاندیز هم کړی دی،خو داسې ښکاري،چې طالبان تر سولې پر جګړو ډېر باور لري.
غني همدا راز وویل،لا یې هم مذاکراتي پلاوی په دوحه کې حضور لري،خو دلته افغان ځواکونه هم پیاوړي دي او د دې وړتیا لري،چې د ګواښونو پر وړاندې مبارزه وکړي.
هغه له نړیوالې ټولنې غوښتنه وکړه،چې په دې سختو شرایطو کې د افغانانو لاسنیوی وکړي او په بېلابېلو برخو کې خپلې مرستې ډېرې کړي.
د څارنې او همغږۍ د ګډ بورډ دا ځانګړې ناسته نن پيل شوه او له ۲۸ د زیاتو هېوادونو او نړیوالو سازمانونو استازو په کې برخه اخیستې.