د افغانستان د بشري حقونو خپلواک کمېسیون ویاند ذبیح الله فرهنګ وايي، د کندهار ولایت په سپین بولدک ولسوالۍ کې یې د طالبانو له لورې د ملکي وګړو او تسلیم شویو دولتي منسوبينو د صحرايي اعدام او وژنو په اړه یې څېړنې پیل کړې او ډېر ژر به یې راپور بشپړ کړي.
فرهنګ زیاته کړه:« د کندهار ولایت سپين بولدک ولسوالۍ قضیې په اړه زموږ څېړنه پيل شوې. زموږ همکاران په دې اړه کار کوي او انشاء الله راپور یې پر بشپړېدو دی. په ډېر نږدې راتلوونکې کې به خپور شي.»
طالبانو یوه اوونۍ وړاندې،چې سپین بولدک ولسوالي له حکومتي ځواکونو ونيوله،ورسره سم یې په اړه داسې راپورونه خپاره شول، چې ګواکې دغې ډلې په یادې ولسوالۍ کې سلګونه ملکي او هغه کسان،چې مخکې يې دولتي دندې لرلې،له کورونو اېستلي او بیا یې وژلي دي.
اخوا د طالبانو ویاند ذبیح الله مجاهد بیا دغه تورونه رد کړي او زیاتوي،چې سپین بولدک ولسوالۍ کې یوازې دوه کسان د شخصي دښمنۍ له امله وژل شوي او په اړه يې د دوی پلټنې روانې دي.
مجاهد زیاتوي:« داسې پروپاګند خپور شوی دی،چې ګواکې د کندهار ولایت په سپين بولدک ولسوالۍ کې سلګونه کسان نادرکه دي، په سلګونه وژل شوي او نورې داسې اوازې خپرې شوي،چې دا واقیعت نه لري. موږ له ټولو هېوادوالو او رسنیو غواړو،چې په دې اړه هېڅ تشويش ونه لري. له دې وړاندې یوه شخصي پېښه شوې،چې دوه تنه په کې وژل شوي او دواړه د یوه کور غړي دي. د هغوی موضوع هم تر څېړنې لاندې ده.»
د کندهار د امنیې قوماندانۍ ویاند جمال ناصر بارکزی وایي، د دوی د اسنادو له مخې،دغه کسان طالبانو وژلي.
هغه که څه هم په دې برخه کې کوم اسناد له رسنیو سره نه دي شریک کړي،خو وايي،د دوی د څېړنو تر بشپړېدو وروسته به کره اسناد هم شریک کړي.
