په هرات ولایت کې د ښځو حقونو یو شمېر فعالانې او د جګړې قربانیان راټول شوي او ټېنګار یې وکړ،چې د سولې په خبرو کې باید د جګړې قربانیانو او ښځو ته ونډه ورکړل شي.
دوی وايي، لکه څنګه چې اړتیا ده د سولې خبرو روان بهیر کې د ښځواو جګړې قربانیانو غوښتنوته پام نه دی شوی.
دوی وايې د جګړې قربانیان او ښځې نور له جګړې ستړي او هېواد کې د تلپاتي سولې تمه کوي.
مدني فعاله الناز امیني وايي:« موږ نن غواړو،چې دا موضوع د هغو کسانو غوږونو ته ورسوو،چې د سولې راوستلو په برخه کې کار کوي. د افغانستان خلک واقعا نور ستړي شوي دي. دوی سرتاسري او دایمي سولې ته اړتیا لري.»
دلته راغلي ښځې نیوکه کوي،چې د سولې خبرو کې تر اوسه پورې ښځو او د جګړې قربانیانوته ځای نه دی ورکړل شوی .
دغه مدني فعالانې اندېښنه لري، که چیرې د سولې خبرو کې د دوی حقونو او غوښتنوته پام ونه شي،د تېرو شلو کلونو لاسته راوړنې به له ګواښ سره مخ شي.
مدني فعاله محدثه احمدي وايي:«موږ د سولې مذاکراتو په پيل سره ګورو،چې دواړه غاړې ښځو ته کم اهمیت ورکوي او د ان د هغوی خبرو ته. زموږ وېره دا ده،چې ښځې په تېرو ۲۰ کالونو کې په ډېرې سختۍ سره اوس یو ځای ته رسېدلي، بیا ځلې حاشیې ته کش نه شي.»
له دې سره دوی پر دواړو لورو غږ وکړ،چې جګړه بس او له رامنځته شوې فرصته ګټه واخلي.
هرات کې یوشمېر دیني علماوو هم سوله د اسلام مبارک دین امر بولي او غوښتنه کوي،چې نور باید جګړه پای ومومي.
دوی ځکه د سولې غوښتنه کوي،چې ګڼو ولایتونو کې جګړې زور اخیستي او له افغان ځواکونو او طالبانو سربېره ملکي وګړو ته هم مرګ ژوبله اوړي.