د احمد شاه مسعود بنسټ مشر احمد ولي مسعود په کابل کې د یوې خبرې ناستې پر مهال وویل، د امریکا، بریټانیا او اروپايي ټولنې له هغې خبرپاڼې ملاتړ کوي، چې افغانستان کې یې د انتقالي حکومت جوړېدو وړاندېز کړی دی.
مسعود وايي،اوسنی حکومت نه د سولې او نه د جنګ واک لري او یوازې د تاوتریخوالي په دوام کې خپله بقا لټوي.
مسعود زیاته کړه :« د حکومت دوام، نه موږ جګړه کې او نه هم سوله کې بریا ته رسولی شي.غوره دا ده، که د جنګ لپاره وي، یو واضح تعریف یې وکړي، خو که د سولې لپاره وي، باید یو لنډمهالی بې پرې حکومت رامنځته شي.»
احمد ولي مسعود پر حکومت نیوکه کوي،چې ولس ته یې نه ده روښانه کړې،چې جنګ کوي او که سوله.
هغه وایي، حکومتي مشران بیلا بیل نظرونه لري او همدا لامل دی،چې ستونزې نه شي مهار کولی.
په ورته وخت کې مسعود حکومت د امنیتي او دفاعي ځواکونو په مدیریت کې هم پاتې وباله.
هغه وايي:«که چېرې د افغان امنیتي او دفاعي ځواکونو قرباني او د خلکو مقاومت نه وه، ښايي موږ نن ورځ یوه بل حالت کې وو.»
مسعود له حکومت غواړي،چې د ولسي پاڅونونو ملاتړ وکړي، امکانات ورته برابر کړي او په پوځي چوکاټ کې نه، بلکې د نظام په اډانه کې ځای ورکړي.