امنیتي سرچینې وايي، د امریکایي ځواکونو B-52 جنګي الوتکو یو ځل بیا د کندهار په سپین بولدک ولسوالۍ او کندهار ښار کې طالبان په نښه کړي.
سرچینې وايي، دغه بریدونه تېره شپه د سپین بولدک ولسوالۍ اړوند د “حوت غره” سیمه کې د طالبانو پر دوو هاموې ټانګونو شوي.
یادو سرچینو زیاته کړې، چې برید امریکايي B-52 الوتکې کړی، چې پر مهال یې دوه ټانکونه له منځه وړل شوي او لس طالبان پکې وژل شوي دي.
سرچینه وايي، د امریکا هوایي ځواکونو دغه راز د کندهار ښار شپږمي حوزې په “محلجات” سیمه کې پر طالبانو هوايي بریدونه کړي.
امنیتي سرچینو په دې بریدونو کي د اتلسو وسله والو طالبانو د وژل کېدو او د ګڼو نورو ټپی کېدو خبره کوي.
طالبانو تر اوسه د امریکایي ځواکونو د دغو تازه هوايي بریدونو په اړه کوم غبرګون نه دی ښودلی.
دا له تېرې اوونۍ راهیسې کندهار کې دویم ځل دی، چي د امریکا هوایي ځواکونه طالبان په نښه کوي.
تېره اوونۍ کې یې هم د کندهار د شاه ولیکوټ ولسوالۍ اړوند “وچ باغتو” او د کندهار ښار د دیارلسمې حوزې اړوند “سرې غونډۍ” سیمو کې پر طالبانو هوايي بریدونه کړي وو.
