په افغانستان کې د ملګرو ملتونو مرستندویه دفتر یا یوناما په خپل تازه شپږ میاشتني راپور کې وايي، د ۲۰۲۰ زېږدیز کال د لومړیو شپږو میاشتو پرتله د روان کال په لومړیو شپږو میاشتو کې د ملکي وګړو مرګ ژوبله ۴۷ سلنه زیاته شوې.
راپور کې ویل شوي، که روان حالت دوام وکړي، روان ۲۰۲۱ زېږدیز کال به د ملکي تلفاتو له اړخه له ۲۰۰۹ کال راپدېخوا تر ټول خونړی کال وي.
راپور کې وړاندې ویل شوي، چې د روان زېږدیز کال د جنورۍ له لومړۍ نېټې د جون میاشتې تر پایه ۱،۶۵۹ ملکي افغانان وژل شوي او ۳،۲۵۴ نور ټپیان دي.
راپور کې د ماشومانو او مېرمنو وژل کېدل د اندېښنې وړ بلل شوي دي.
راپور کې راغلي،چې د دې مرګ ژوبلې ډېر مسوولیت چې ۶۴ سلنه کېږي، د حکومت مخالفو وسله والو ته ورګرځي چې طالبان، غير مسوول وسله وال او داعش په ترتيب د دې تلفاتو مسوول ګڼل شوي.
په راپور کې همداراز ویل شوي،چې ۲۳ سلنه افغان امنیتي او دفاعي ځواکونه هم د ملکي تلفاتو عاملین دي.
دغه راز یوناما په خپل راپور کې د جګړې پر دواړو غاړو غږ کړی دی، چې د تاوتریخوالي پر ځای دې د خبرو مېز ته حاضر شي.
يوناما ليکلي چې له ۲۰۰۹م کال راهیسې،چې دا بنسټ د ملکي تلفاتو سيستماتيک ثبت او سند پيل کړ،دا لومړی ځل دی،چې نړیوالو ځواکونو ته د ملکي تلفاتو هېڅ پېښه نه ده منسوب شوې.
خو افغان حکومت او طالبانو بیا دغه راپور رد کړی دی.
د افغانستان امنیتي او دفاعي سکتور ویاند جنرال اجمل عمر شینواري کابل کې د یوه خبري کنفرانس پر مهال وویل، موږ په خپلو ټولو عملیاتو کې لومړنی فکتور چې په پام کې نیسو، د ملکیانو د مرګ ژوبلی مخنیوی دی.
طالبان د یوناما دا راپور یو اړخیز یادوي او وايي، د ملکي وګړو د خوندیتوب لپاره دوی جدي پام کوي.
