اسراییلو د حماس ډلې اویا مرکزونه په نښه کړي.
اسراييلو د حماس ډلې پر ۷۰ مرکزونو هوايي بریدونه کړي دي.
اسراييلي ځواکونه وايي، دا بریدونه یې وروسته له هغې کړي چې حماس ډلې د اسراييلو پر خاوره راکټونه وتوغول.
راپورونه وايي، په دې توغندیو کې درې تنه وژل شوي او لسګونه نور ټپیان دي.
اخوا د غزې اوسیدونکي وايي، د اسراييلي ځواکونو په هوايي بریدونو کې ګڼو ملکي وګړو ته هم مرګ ژوبله اوښتې ده.
ویل کیږي چې حماس ډلې پر اسراييلي خاوره کابو ۱۰۰ توغندي توغولي دي.
د اسراييلي ځواکونو او حماس ډلې ترمنځ د تیرې اونۍ راهیسې جګړه سخته شوې ده.
