د خوست ولایت ګربزو ولسوالۍ کې اړوند ډیورنډ فرضي کرښه کې د وروستۍ جګړې له امله بې ځایه شویو کورنیو غړي وايي، وروسته له هغې د خپلو کورونو پرې ښودو ته اړ شول چې پاکستاني ځواکونو يې له کرښې پورې غاړه پر کورونو هاوانونه وتوغول.
دوی زیاتوي، د نښتې د بيا پيل له وېرې خپلو کورونو ته نه شي ستنېدلی.
دغه کورنۍ له سرپرست حکومت او مرستندويه ادارو غوښتنه کوي چې د څښاک پاکو اوبو، صحي خواړو او د سرپناه برابرولو په برخو کې ورسره همکاري وکړي.
له ګربزو ولسوالۍ بې ځایه شوی داوود خان وايي: «زموږ کورونو ته د توپونو مرمۍ راتلې، ځکه را ووتلو او دلته راغلو. هرڅه رانه پاتې دي، یوازې خېمې لرو او د غاړې جامې.»
د سيد بادشاه په نوم بل بې ځایه شوی بیا وايي: «موږ دلته په دې ډاګ او د غره لمن کې خېمې وهلې دي. دلته هر ډول خزندې شته او ښايي زموږ ماشومانو ته زیان ورسوي. موږ غواړو جګړه ودرېږي او امنیت راشي.»
بل پلو، د خوست ولایتي ځايي چارواکي وایي، د پاکستاني لوري له خوا د توپونو او هاوانونو مرمۍ د عامو خلکو په کورنو لګېدلې او له امله یې لسګونه کورنۍ اړ شوې چې خپل کورونه پرېږدي.
دوی همدا راز ډاډ ورکوي چې هڅې روانې دي ترڅو د جګړې له امله بې ځایه شویو کورنیو لپاره د مرستندويه بنسټونو او ولایتي ادارې پر مټ د سرپناه ترڅنګ په نورو اړينو برخو کې هم اسانتياوې برابرې شي.
د خوست والي وياند مستغفر ګربز وايي: « دا چې پاکستان د جګړې اصول نه مراعت کوي او پر عامو کورونو توپونه او هاوانونه توغوي، خلک اړ دي چې خپلې سیمې او کورونه پرېږدي. د خوست ولایتي اداره هڅه کوي ترڅو بېځایه شویو خلکو ته د سرپناه او نورو اړوند توکو په برخه کې مرسته وکړي.»
څو ورځې وړاندې د خوست ولایت غلام خان بندر کې د افغان او پاکستاني ځواکونو له لفظي شخړې وروسته نښته رامنځته شوه.
د مالوماتو له مخې، په دې نښته کې درېیو پاکستاني پوځيانو وژل کېدو ترڅنګ یو افغان کارګر هم ژوند له لاسه ورکړی او د غلام خان بندر لاره تر اوسه د هر ډول تګ راتګ پر مخ تړل شوې ده.
