د امريکا دفاع وزير لویډ اسټن د الاسکا هوايي اډه کې د خبرو پر مهال وویل، افغان حکومت اوس مهال په ګڼ مېشتو سېمو کې ځواکونه ځای پر ځای کوي.
اسټن وايي، افغان حکومت د دې وړتيا او ظرفيت لري، چې له لاسه وتلې سيمې بېرته ونيسي او دې برخه کې هغوی ژمنتيا هم لري.
په ورته وخت کې آسټن وايي، له افغان حکومته غواړي، له طالبانو د نيول شويو سيمو بېرته نېولو پر ځای دې د هغوی د پرمختګونو مخه ونيسي.
هغه زیاته کړه:« هغه څه چې افغان رهبري يې اوس کوي، په ګڼ مېشته ځايونو کې د ځواکونو پياوړتيا ده، دا چې هغوی به طالبان له پرمختګ راوګرځوي او که نه؟
زه فکر کوم لومړی څه،چې هغوی يې بايد وکړي، د طالبانو د پرمختګ مخنيوی دی او بيا دې خپل ځان هغه موقف ته برابر کړي، چې وکړی شي، له لاسه وتلې سيمې بېرته ونيسي. افغان رهبرۍ سره زما اړيکې ښيي،چې هغوی دې کار ته ژمن دي.»
اسټن د افغان ځواکونو پر وړتيا ډاډ وښود او وايي، هغوی ظرفيت لري او کولی شي، چې د طالبانو د پرمختګونو مخه ونيسي.
اسټن زیاتوي:« دوی ( افغان ځواکونه) وړتيا او ظرفيت لري،چې پرمختګ وکړي او د طالبانو د پرمختګونه مخه ونيسي، خو وبه ګورو، چې څه کېږي.»
اسټن دا څرګندونې داسې مهال کوي، چې په ختيځ کونړ ولايت کې طالبانو له غازي اباد وروسته د یکشنبې پر ورځ ناړۍ ولسوالۍ هم ونیوله.
افغان ځواکونه بیا د هېواد په نورو برخو کې د یو شمېر ولسوالیو او سیمو بېرته نېولو لپاره عملیات پیل کړي دي.
