د عراق لومړی وزير مصطفی الکاظمي وايي، هېواد يې له دې وروسته امريکايي جنګي ځواک ته اړتیا نه لري، چې د اسلامي ډلو پر وړاندې جګړه وکړي.
الکاظمي وايي، له هېواد څخه به يې د امريکايي ځواکونو وتلو مهال وېش له جوبايډن سره په ليدنه کې مالوم شي.
لومړي وزير الکاظمي ويلي، چې هېواد به يې د امريکايي ځواکونو له وتلو وروسته هم د دغه هېواد نظامي روزنې او استخباراتي همکاريو ته اړتیا ولري.
ټاکل شوې، چې الکاظمي سبا دوشنه د امريکا له ولسمشر جوبايډن سره په سپينه ماڼۍ کې وګوري او د دواړو هېوادونو پر اړوندو مهمو موضوعاتو خبرې وکړي.