که څه هم د کابل- کندهار لویه لار د مخکېني حکومت پرمهال ورغول شوه خو د جګړو او درنو بارونو له امله بېرته ویجاړه شوه.
دا مهال د دغې لویې لارې د بیارغولو کارونه روان دي او د زیربنا جوړونې په موخه یې ډېرې برخې ویجاړې شوې دي.
د دې لارې مسافر او موټر چلوونکي که څه هم د لارې له رغولو خوښ دي، خو وايي، کارونه یې ډېر پڅ روان دي او خلکو ته یې لوی سرخوږی جوړ کړی.
موټرچلوونکي شکایت کوي چې د دې لارې ډېرې برخې اړول شوې خو د جوړولو چارې یې ټکنۍ دي او له امله یې خلک له سختو ستونزو سره مخ دي.
موټر چلوونکی مدد خان وايي: « پخوا دغه لاره شپږ ساعته وه، خو اوس له ۱۲ تر ۱۳ ساعتونو اوږده شوې. حکومت ویل موږ یې په شپږو میاشتو کې جوړوو، خو د کار ورو پرمختګ ته په کتو به په دوه کالو کې هم جوړه نه شي. په دې لاره زموږ موټر او مسافر دواړه په تکلیف دي.»
یو بل موټر چلوونکي محمد بیا وايي: « د کابل – کندهار لارې د خلکو زړه تور کړی. جوړوونکو قراردادیانو سړک په بل مخ اړولی، خو جوړونه یې ډېره کراره روانه ده، باید کارونه یې چټک شي.»
د کابل – کندهار لويه لار د هېواد له مهمو ټرانزیټي لارو ګڼل کېږي او نه یوازې څو ولایتونه، بلکې کابل له سوېلي او له لوېدیځې حوزې سره نښلوي، دغه راز د سپین بولدک، اسلام کلا، تورغونډۍ، ابو نصر فراهي او نورو بندرونو زرګونه سوداګریزې لارۍ هم له همدې لارې تګ راتګ کوي.
د دې لويې لارې موټر چلوونکي او مسافر وايي، له کابل څخه تر کندهاره شپږ ساعته لاره پنځلس ساعتو ته اوږده شوې او مسافر د اوږد او خراب مزل له امله په ورځو ورځو ستړي وي.
د دې لارې یو تن مسافر نور احمد وايي: «له کندهاره چې د کابل په لور حرکت وکړو، نفس مو خولې ته راشي. کله چې کابل ته ورسېږو، څو ورځې له ځایه نه شو پورته کېدای. د سړک څنډو ته جوړې کړې خامې ډېرې خرابې شوې دي.»
د کابل – کندهار لارې بل مسافر عبدالرحمن وايي: « ټوله لاره خرابه ده، باید ژر جوړه شي ترڅو خلکو ته سهولت برابر شي. پخوا ۷ ساعته مزل و او اوس ۱۳ ساعته دی.»
د ټولګټو وزارت له بودېجې سربېره، د دې لویې لارې د جوړولو چارې د سرپرست حکومت له خوا په شپږو بېلابېلو برخو کې شپږو شرکتونو ته د کانونو ایستلو په بدل په قرارداد ورکړل شوې.
موده وړاندې، د ټولګټو وزارت چارواکو د خپلو کلنیو لاسته راوړنو د تشرېح په غونډه کې وویل، له را روان ژمي وړاندې به د دې لویې لارې د جوړولو چارې بشپړې شي، خو د کار پڅ بهیر ته په کتو داسې نه ښکاري چې کارونه یې بشپړ شي.
