د کابل ښار احمد شاه بابا مېنې برښنايي پېژندپاڼو دفتر مخې،ته لسګونه کسان راټول شوي،ترڅو برښنايي پېژندپاڼه ترلاسه کړي،خو کارکونکو د دفتر دروازې تړلي او کاري اعتصاب يې کړی.
د برښنايي پېژندپاڼو د وېش یو شمېر کارکوونکي وايي، کار پرې ډېر دی، خو مزد يې کم دی.
اخوا د ښار یو شمېر اوسېدونکي بیا د برېښنايي پېژندپاڼو د ویش له بهیره راضي نه دي او نیوکه کوي،چې مامورین خپلو دفترونو ته پر وخت نه حاضرېږي.
دوی نیوکه کوي،چې حکومت په ځینو برخو کې د برښنايي پېژندپاڼو لرل جبري کړي، خو د ویش مرکزونه کم دي او نه شي کولی په کمه موده کې یې ترلاسه کړي.
د کابل ښار یو تن اوسېدونکی:« په هغه غره کې کارمن یم، کندې وباسم. دا مې خپل کارت دی، دولت راکړی دی. تاسو یې هم کتلی شئ. زه برښنايي پېژندپاڼې ته ډېره اړتېا لرم. له ما سره چې برښنايي پېژندپاڼه نه وي، تنخوا راته نه راکول کېږي.»
کارکونکو په دې سبب کاري اعتصاب کړی،چې ګوندې د احصايې ملي ادارې ورته د تېرې مياشتې معاشونه کم کړي،خو ياده اداره وايي، هر کارکونکی چې څومره کار وکړي،هومره معاش ورته حواله کوي.
د احصايې او مالوماتو ملي ادارې ويانده روينا شهابي وايي: « که چېرې د دوی معاش کم ورکړل شوی وي، لامل یې دا دی،چې کار یې کم ترسره کړی دی. په نورو مرکزونو کې هغو کارکوونکو چې کار ډېر کړی، هغومره معاش چې مستحق یې ول، ورکړل شوی دی.»
برښنايي پېژندپاڼې په يوشمېر ادارو کې جبري شوي،خو مراجعين يې د کار له څرنګوالي خوښ نه دي.
تراوسه تر اتو ميليونو زياتو کسانو د برښنايي تذکرو غوښتنه کړې،چې نږدې شپږو ميليونو ته وېشل شوي دي.