د امریکا استازو جرګې د بهرنیو اړیکو کمېټې مشر مایکل مککال د دې جرګې په ناسته کې د امریکا اوسنۍ اداره تورنه کړې چې له افغانستان د امریکايي ځواکونو له وتلو سره یې په نړۍ کې د واشنګټن حیثیت او باور ته سخت زیان اړولی.
مککال ویلي، د امریکا ملي امنیت کمزوری شوی او اوسني حکومت د دې پر ځای چې له کابله د امریکايي ځواکونو خونړۍ او بدنامه تخلیه تېروتنه وګڼي، د ځواکونو را ایستل خپله لویه بریا بولي.
د مککال په خبره، له کابله د ځواکونو له وتو سره سم امریکايي پوځي تجهیزات په افغانستان کې پرېښودل شول او د کابل پر هوايي ډګر مرګوني برید کې یو شمېر سرتېرو ته مرګ ژوبله واوښته چې په اړه یې باید واکمن چارواکي وپوښتل شي.
هغه زیاته کړې: « ولسمشر بایډن او مرستیالې هریس په ګډون یو کس هم د دې دردوونکې ماتې او تراژیدۍ په اړه ځواب نه دی ویلی. د امنیت شورا ویاند جان کربي د دې تراژېديکې تخلیې د لامل په اړه وايي چې موږ ټولو په دې اړه ځواب ورکړی. دا تېر ایستونکي ځوابونه دي. که د امریکا چارواکي ځواب نه ورکوي، د امریکا استازي باید دا خپل مسوولیت وګڼي.»
د سیاسي چارو کارپوهان د امريکا پر مشرۍ افغانستان ته د نړيوالو ایتلافي ځواکونو راتګ تېروتنه بولي او زياتوي چې د ۲۰ کلنې جګړې پرمهال له مقاومت سره د مخ کېدو پایله کې يې خپل سرتېرې بېرته له افغانستانه بهر کړل.
د سیاسي چارو کارپوه حکمتالله حکمت وايي: « له افغانستانه د امریکایانو وتل ستراتیژیکه تېروتنه نه بلکې د امریکا د وخت حکومت یوه لویه بریا وه. ستراتیژيکه تېروتنه په ۲۰۰۱ کال کې افغانستان ته د امریکايي ځواکونو راتګ او پر افغانانو ظلمونه وو. که دوی په ۲۰۲۱ کال د قطر پروسې له مخې نه وای وتلې، دېته مجبوره کېدل چې په ډېرې بدنامۍ او له درنو تلفاتو وروسته ووځي. »
ځېنې نور بیا د امریکا راتګ د هغوی ستراتیژيکي ګټې بولي او وایي، امریکا د خپلو سیاسي موخو د ترلاسه کولو لپاره په افغانستان کې نظامي حضور درلود او اوس هم د خپلو سیاسي اهدافو د تعقیب لپاره په سیمه کې حضور مهم ګڼي.
د سیاسي چاترو کارپوه محمد زلمی افغانیار وايي: « د مکان څرګندونې سیاسي مانورې دي. د افغانستان سیاسي وضعیت د نړۍ ټولو هېوادونو ته څرګند دی او په دې پوهېږي چې افغانستان ته د امریکا راتګ د څه لپاره و. دوی غوښتل خپلې ستراتیژیکي ګټې تعقیب کړي نه دا چې دلته ملت جوړونه او حکومت جوړونه وکړي. که امریکا تعامل غواړي نو تعامل د خبرو اترو پر محور کېږي او داسې چې د دواړو اړخونو ګټې په کې خوندي وي.»
د امریکا استازو جرګې د بهرنیو اړیکو کمېټې ریيس مایکل مککال د امریکا اوسنی ولسمشر جوبایډن او د هغه مرستیاله کامالاهریس، د امریکا ملي امنيت سلاکار جېک سولیوان، د ملي امنیت مرستیال مشاور جاناتان فاینر او د امنیت شورا ویاند جان کربي، د افغانستان سولې په برخه کې د امریکا پخوانی استازی زلمی خلیلزاد او یو شمېر نور امنیتي چارواکي له افغانستان د امریکايي ځواکونو د ناکامه وتلو مسوولین ګڼلي دي.
