د سیاسي چارو یو شمېر شنونکي وايي، د طالبانو دا غوښتنه چې ولسمشر غني دې واک پریږدي، د سولې له روحیې سره برابره نه ده او افغانان په یوه بله جګړه کې ښکېلوي.
دوی وايي، د اوسني حکومت پرځای د نوي حکومت رامنځته کول او د ولسمشر د استعفا غوښتنه پردۍ اجنډا ده او په دې باور دي چې د طالبانو دغه غوښتنه چې د ولسمشر غني په موجودیت کې د سولې ټینګښت ناشونی دی، د افغانستان پر زیان ده.
سیاسي فعاله مریم معروف وايي: «د طالبانو له لوري د ولسمشر د استعفاء غوښتنه د داکټر نجیب له دورې سره مشابه غوښتنه ده، چې د افغان ولس د بدبختۍ لامل شوه او اوس هم هېڅ ضمانت نشه، که د طالبانو داسې غوښتنه هم ومنلي شي، افغانان دې سولې او دایمي ثبات ته ورسیږي.»
بل پلو، د سولې سازمان مشر زمان ګل دهاتي پر دې باور دی، په هغه صورت کې چې دواړو لوریو ترمنځ سیاسي تفاهم وشي او واک بل ته انتقال ګېږي، نو بیا دې هم له قانوني پروسیجرونو کار واخېستل شي.
دهاتي زیاته کړه: «که مسله د واک د ویش پرسر وي، نو هغه مهال د انتقالي حکومت بحث مطرح دی، چې دواړه لوري یو سیاسي تفاهم ته رسیدلي وي او له دې وروسته باید ولسمشر واک درېیم ګړي ته انتقال کړي او له دې پرته دا کار د افغانانو پر زیان دی.»
ځینې بیا وايي، د ولسمشرغني د لرې کیدو غوښتنه د طالبانو له اصلي موخو ده او دغه مسله یې له پخوا نه د امریکا له ولسمشر سره شریکه کړې وه، چې د ولسمشر غني له خوا رد شوه.
د سیاسي چارو شنونکی طارق فرهادي وايي:«طالبانو د ولسمشر غني د استعفاء غوښتنه شپږ میاشتې وړاندې د امریکا نوي حکومت ته وړاندې کړې وه او د بایډن ادارې دا مسله له کابل سره شریکه کړې، چې د کابل ځواب همدا و، چې موږ له ځانه خپله دفاع کوو او اوس دغه مسله طالبانو نړیوالو رسنیو سره مطرح کړې.»
تازه د طالبانو سیاسي دفتر ویلي، ترهغې چې ولسمشر غني واک پرې نه ږدي، د سولې ټینګښت ناممکن دی او د سولې لپاره باید واک درېیم لوري ته انتقال شي.
د سهیل شاهین دغو څرګندونو توند غبرګونونه راپارولي، چې دغه ډله په بېلابېلو پلمو د سولې لپاره شته فرصتونه ضایع کوي او د سولې رسمي خبرې نه پيلوي.
