وروسته له هغې چې د ایران حکومت په دغه هېواد کې افغان ماشومان دولتي او خصوصي ښوونځيو ته له جذبېدو منع کړل، تازه د ناروې کډوالو شورا (اېن.آر.سي) په دې هېواد کې افغان ماشومانو ته د ښوونيزو فرصتونو چمتوو کولو خبر ورکړی.
دغې شورا په ایران کې د تلې (میزان) په لومړۍ نېټه د نوي ښوونیز کال د پيل په مناسبت دا خبره کړې او زياتوي چې دغلته به افغان ماشومانو ته د ليک لوست زده کړې لپاره کورسونه جوړ کړي.
د ناروې کډوالو شورا زیاته کړې:« نن په ایران کې د ښوونځیو د پیل ورځ ده. هغه هېواد چې دا مهال د ۱.۵ میلیونه افغان ماشومانو کوربه دی. زده کړې له هر څه وړاندې بنسټ سره به په ګډې ملګرتیا، د وړیا کورسونو په جوړولو سره هغو افغان ماشومانو ته د زده کړو زمینه برابره کړو چې ایران کې ښوونځیو ته له تګ پاتې دي.»
د دغې شورا د مالوماتو له مخې، دا مهال په ایران کې نږدې ۱.۵ میلیونه افغان ماشومان اوسېږي.
د سیاسي چارو یو شمېر کارپوهان دې ته په پام له سرپرست حکومت او نړیوالو سازمانونو غواړي چې افغان ماشومانو ته د نورو هېوادونو پر ځای په کور دننه د زده کړو مساوي زمینه برابره کړي.
د دوی په خبره، که چېرې په هېواد کې دننه د نجونو او هلکانو لپاره د زده کړو مساويانه زمينه برابره نه شي، دا چاره به له افغانستانه د وتلو او کډوالۍ بحران دایمي کړي.
د سیاسي چارو کارپوه محمد ادریس ځاځی وايي: « افغان ماشومانو ته باید د افغانستان په داخل کې د ښوونې او روزنې زمینه برابره شي. که داسې نه شي، په لوی لاس افغانان هڅول کېږي، چې د زده کړو لپاره نوور هېوادونو ته مهاجرت وکړي. زه په دې اند یم چې نړیوال سازمانونه، هېوادونه او بنسټونه باید هڅه وکړي چې د افغانستان په داخل کې د زده کړو پر وړاندې شته خنډونو او محدودیتونو لرې کولو لپاره حل لارې پيدا کړي.»
ځینې نور بیا د ناروې د کډوالو شورا د دغه ګام هرکلی کوي، خو ترڅنګ یې اندېښنه لري چې هلته له زده کړو وروسته ترلاسه کېدونکي اسناد به سرپرست حکومت ته د اعتبار وړ نه وي او دا چاره به افغانان له ستونزو سره مخ کړي.
د سیاسي چارو کارپوه محبالله شریف وايي: « لویه ستونزه به دا وي چې د هغوی تعلیمي اسناد به څه ډول رسمي کېږي. زه فکر کوم په تهران کې د افغانستان سفیر کولی شي له پوهنې وزارت سره په همکارۍ په ایران کې دېره افغان کډوالو ته د زده کړو اسانتیاوې برابرې کړي.»
په ورته وخت کې، د بهرنیو چارو وزارت چارواکي وایي، په ايران کې افغان ماشومانو ته د زده کړو زمينې برابرولو لپاره له ايراني چارواکو سره په خبرو بوخت دي.
د ناروې کډوالو شورا داسې مهال په ایران کې مېشتو افغان ماشومانو لپاره د زده کړو زمېنه برابروي چې تازه دغه هېواد د افغان کډوالو پر وړاندې خپله پاليسي سخته کړې او له امله یې سلګونه کورنۍ له دغه هېواده وتلو ته اړې شوې دي.
