په قطر کې د طالبانو سیاسي دفتر غړي سهیل شاهین له اسوشیټیډ پرس خبري آژانس سره د مرکې پر مهال افغان حکومت سولې ته پر نه ژمنتیا تورن کړی او زیاته کړې یې ده،چې دوی هم د واک انحصار نه غواړي.
هغه وايي، په افغانستان کې مخکې هم واک انحصار شوی و،چې حکومتنه یې ناکام کړی و.
د شاهین په خبره،چې د افغانستان له اوسني حکومت سره اوربند نه واقع بینانه او نه هم عملي تګلاره ده.
شاهین زیاته کړه:« افغان حکومت زموږ تسلیمي غواړي. دوی غواړي،چې موږ اوربند وکړو او اوسنی حکومت خپل کار ته دوام ورکړي. دا تګلاره نه واقع بینانه او نه هم عملي بڼه لري. ټول افغانان باید پر یو نوي حکومت هوکړه وکړي چې د اوسني حکومت ځای ناستی شي او هغه حکومت به بیا ټولو ته د منلو وړ وي.»
سهیل شاهین د کورنیو جګړو په تړاو ویلي،چې د دوی په ګډون هېڅ افغان د دا ډول جګړو غوښتنکی نه دی.
هغه د سقوط شویو ولسوالیو په اړه ویلي،چې د جګړې په پایله کې نه بلکې د سیمې خلکو په منځګړیتوب نږدې دوه سوه و لسوالۍ نیولې دي.
شاهین زیاته کړه:«هغه ولسوالۍ چې زموږ لاس ته لویدلي او هغه عسکر چې موږ ته تسلیم شوي،د جګړې په پایله کې نه بلکې د خلکو په منځګړیتوب ترلاسه شوي دي. که داسې نه وای،موږ ته به په اتو اونیو کې د ۱۹۴ ولسوالیو نیول ډېر سخت و.»
شاهین د هغو کسانو په تړاو چې بهر ته ځي وویل، په افغانستان کې اقتصاد کمزوری او د ژوند کچه ټیټه ده،که دوی بهر ته ځي دا د دوی خپله خوښه ده.
هغه وایي، هغو افغان خبریالانو،چې له بهرنیو رسنیو سره یې کار کړی،ستونزه نه لري او راتلونکې کې هم خپل کار ته دوام ورکولائ شي.
شاهین وايي:« موږ له خبریالانو سره هېڅ ستونزه نه لرو،په ځانګړې توګه له هغو خبریالانو سره چې له بهرنیو رسینو سره یې کار کړی دی. دوی په راتلونکې کې هم خپل کار ته ادامه ورکولی شي.»
په دوحه کې د طالبانو مرکچي پلاوي دا غړی په داسې حال کې یادې څرګندونې کوي،چې ټاکل شوې ده،راتلونکو څو ورځې کې د افغان حکومت او طالبانو ترمنځ قطر کې یوه بله غونډه هم ترسره شي.
ویل کیږي،طالبانو د درې میاشتني اوربند په بدل کې له افغان حکومت نه د خپلو اووه زره بندیانو د خلاصون غوښتنه کړې، هغه څه چې افغان حکومت یې تر اوسه مخالفت کوي او ولسمشر غني د پنځه زره طالب بندیانو خلاصون هم یوه تېروتنه بللې ده.
