په کابل کې یو شمیر هټیوال وایي، د نورو کلونو په پرتله سږ کال د اختریزو توکو بازار څو چنده کم رنګه دی او خلک د سودا کولو لپاره زړه نه ښه کوي.
د کابل ښار یو تن هټیوال وايي:« اوس کارونه ډېر ضعیفه دي، تېر اختر ښه وه،دې اختر کې بیخي حالات سره خراب دي. خلک په دې فکر کې دي، چې ونه وځي. کارونه پر ټپه ولاړ دي.»
هټوال:«کارونه ډېر ضعیفه دي، اقتصادونه خراب دي، د جنګ له امله هېڅ کاروبار نشته ټول دغسې ناست دي. دا ټول د جنګ له لاسه خراب دي، خدای دې سوله راولي.»
بل پلو یو شمېر پیردونکي بیا وایي،جګړې کورونا وبا او ضعیف اقتصاد دې ته اړ کړي، چې له سودا کولو لاس پر سرشي.
پېرېدونکی: « د نورو کلونو پرتله سږکال حالات ډیر خراب دي، د روزګارونو حالت مخ په خرابیدو دی، د جنګونو له امله ډېر مشکلات رامنځته شوي دي. خلک ګرځي، بېروبار دی، خو سودا نه کوي.»
پېرېدونکی:« دا هر څه جګړې خرابه کړي دي، کورونا وبا خرابه کړي. خدای دې حالات سم کړي،چې اخترونه بېرته پخوانی حالت ته راشي.»
سږکال د نورو کلونو پرتله متفاوت اختر دی، سلګونه والسوالۍ سقوط شوي او زر ګونه کورنۍ د جګړو او نامنیو له امله بې ځایه شوي دي.
