د فراه ښاروالۍ مسوولین وایي، د روان کال په لړ کې د ۱۲۰ میلیونه افغانیو په ارزښت د شاوخوا ۲۳ لویو او کوچنیو پروژو د پلي کولو او تطبیق پلان لري چارې به یې د روان کال تر پایه بشپړي شي.
دوی زیاتوي، دغو پروژو کې د سړکونو او پولچکونو جوړول او ترمیمول، د ښار او سړکونو روښانه کول، استنادي دېوالونو جوړول، د ښاري نظم ټینګښت په موخه د څلور لارو جوړول او یو شمېر نورې پروژې شاملې دي چې د یو شمېر هغو چارې په بشپړېدو دي او یو شمېر نوري یې تر کار لاندې دي.
د فراه ښاروال سردارمحمد مرصاد وايي: « د ۱۴۰۳ کال لپاره د فراه ښاروالۍ له خوا ۲۳ پراختیايي پروژې په پام کې نیولې چې اکثریت یې دا مهال تر کار لاندې دي او پاتې نورې به هم پيل شي.»
مرصاد دغه راز د فراه له اوسېدونکو غواړي چې د پروژو ساتنې او پلي کولو برخه کې له ښاروالۍ سره همکاري وکړي.
هغه زیاتوي: « د فراه له خلکو مو غوښتنه دا ده چې د ښار آبادولو او د پروژو ساتنې او مراقبت په برخه کې له موږ سره همکاري وکړي؛ ځکه چې د ولس له همکارۍ پرته د پروژو پلي کول او ساتنه نا شوني دي.»
بله خوا، د فراه اوسېدونکي د ښاروالۍ له پروژو خوښ دي او وایي، د تېر پرتله دغه ولایت کې پراختیایي پروژو او ښاري نظم ته پاملرنه زیاته شوې.
دوی همداراز د پراختیایي پروژو پر زیاتوالي او د ښاري بیارغونې هڅو پر چټکوالي ټینګار کوي.
د فراه یو تن اوسېدونکی وايي: «اوس چې کله د شپې راووځو، د فراه له ښار څخه خوند اخلو؛ ځکه ښار پاک او روښانه شوی. په ټوله کې د ښاروالۍ کارونه د ستایلو دي.»
د فراه ښار یو بل اوسېدونکی بیا وايي: « د فراه ښار د تېر پرتله ډېر ښه شوی او د لویو ښارونو په څېر ښکلا لري.»
فراه یو له هغو ولایتونو دی چې د تېرو څو لسیزو جګړو له امله د مرکزي حکومت له پاملرنې بې برخې وو، خو اوس مهال د ښاروالۍ له لورې د پراختيايي پروژو په پیل سره نه یوازې دغه ښار ښکلا پيدا کړې بلکي سلګونه بې روزګاره کسانو ته په کې د کار زمينه هم برابره شوې.
