سرچینې وایي، د کونړ پر غازي اباد ولسوالۍ له سهار ۴ بجو راهیسې طالبانو جګړه پېل کړی او اوس هم روانه ده.
ځایي سرچینو شمشادنیوز ته ویلي، جګړه د “جلالا” په نوم د اردو په یوه بېز پیل شوې او اوس د غازي اباد ولسوالۍ په مقام او ګڼ شمېر نور امنیتي پوستو هم روانه ده.
سرچینې زیاتوي، په جګړه کې ۱۳ امنیتي سرتېري وژل شوي او ۴ نور ټپیان دي.
کونړ کې د دویمې پلې لوا قوماندانۍ وایي، له سهار رهیسې سخته جګړه پېل شوې، خو د مرګ ژوبلې دقیق معلومات نشته.
د دې لوا د مطبوعاتو آمر شاهد شمشاد ته وویل، دا جګړه د قاري ضیاءالرحمن په نوم کس چې د کونړ لپاره د طالبانو مرستیال والي ځان بولي، رهبري کوي.
شاهد وویل: «اوس هم سخته شدیده جګړه ده، پدې جګړه کې پنجابیان او د پاکستان نور اتباع هم دي، آن د جګړې عمومي رهبري هغوی کوي.»
هغه زیاتوي، جګړه اوس مهال د “جلالا ” پر بیز، ولسوالۍ مقام او پر ډېری پوستو دوام لري.
بلخوا، د کونړ امنیه قوماندانۍ مطبوعاتي دفتر هم جګړه تائیدوي او وایي چې دا مهال پر “جلالا ” بېز سخته جګړه روانه ده.
د قوماندانۍ د مطبوعاتو آمر فرید دهقان شمشاد ته ویلي، تازه ځواکونه سیمې ته رسېدلي او هلته له تېرې یوې میاشتې ځواکونه په جګړه کې دي.
طالبانو په تازه جګړو کې خپلې غاړې ته د اوښتو تلفاتو په اړه څه نه دي ویلي.
خلک وېره لري، که ژر هوایي مرسته ور ونه رسېږي، ولسوالۍ به د طالبانو لاس ته ولوېږي او د سختو تلفاتو شاهدان به وي.
د کونړ غازي اباد ولسوالۍ کې جګړه اوس اوس شدیده شوې، خو له یوې میاشتې ډېره موده کېږي چې د اسداباد – غازي اباد، ناړۍ او د نورستان د کامدېش او برګمټال ولسوالیو لارې تړل شوې دي.
هلته خلک د خوراکي او صحي توکو له سختو ستونزو سره هم مخ دي.