افغان ولسمشر محمد اشرف غني نن په ارګ کې د لوی اختر له لمانځه وروسته ملت ته په اختریز پیغام کې وویل، طالبان اسلامي او ملي مشروعیت نه لري او د پاکستان له مدرسو په ځانګړي توګه له حقانیه او عثمانیه د افغانستان په اړه پرېکړه اخلي.
په ورته وخت کې ولسمشر غني وايي، طالبان د سولې اراده او نیت نه لري.
هغه وايي، د افغان ځواکونو مقاومت د نظام بقا نه،بلکې د خلکو د ساتلو لپاره دی.
دغه راز ولسمشر د ۵ زره طالب زندانیانو آزادول تېروتنه یاده کړ او پر وینا یې آزاد شوي ټول جګړې ته ستانه شوي دي.
ولسمشر د زندانیانو ازادولو پړه پر بهرنیانو او هغو کسانو واچوله،چې پر خبره یې افغان حکومت یې سولې ته ژمن نه باله.
ولسمشر وايي، پاکستاني چارواکي د طالبانو په تړاو واحد نظر نه لري.
هغه وايي، عمران خان ورته ویلي،چې طالبان به هم د مجاهدینو په څېر خپل منځي جګړه پيل کړي.
ولسمشر تور پورې کړ،چې طالبانو ۱۵۰ جوماتونه وران کړي او ګڼې ټولګټې ودانۍ یې نړولي دي.
ولسمشر له طالبانو پوښتنه وکړه،چې له القاعده، لشکر طیبه او جیش محمد سره څه اړیکې لري.
هغه د سیاسي مداخلې مخنیوي لارښونه وکړه،چې پر وینا یې سیاسي مداخله د ماتې لامل کېږي.
هغه زیاته کړه، چې په ارګانونو کې د مکافاتو او مجازاتو پر ځای سیاسي لاسوهنې پيل شوې وې.
په داسې حال کې چې ولسمشر غني، پخوانی ولسمشر حامد کرزی عبدالله عبدالله او نور لوړ پوړي چارواکي په ارګ کې پر لمانځه بوخت و، چې پر کابل ښار درې توغندي ولګېدل.