د اسلامي امارت بهرنیو چارو وزارت سرپرست مولوي امیرخان متقي په کابل کې د بهرنیوسفیرانو سره په یوې ناسته کې ویلي، هغه هېوادونه چې د افغان کډوالو کوربه دي باید زغم ولري.
متقي په دغه ناسته کې د فغان کډوالو له له ټولو کوربه هېوادونو او په تېره بیا له ایران او پاکستان غوښتي چې له افغان کډوالو سره ښه چلن وکړي او پریږدي چې افغان کډوال په خپلې خوښې بېرته خپل هېواد ته راستانه شي.
متقي له هېوادونو غوښتي چې له افغان کډوالو سره باید زور زیاتی ونه شي او کوربه هېوادونه باید بشري حقونو ته ژمن پاتې شي.
هغه په دې اړه وايي:« له ټولو هېوادونو هیله کوو د مهاجرینو په را ایستلو کې له زغم او احتیاط کار واخلي. موږ د دوی له کوربه توب مننه کوو او په راتلونکي کې هیله لرو چې له افغان مهاجرو سره ښه رویه وکړي، په ځانګړې توګه له پاکستان او ایران. زموږ غوښتنه دا ده چې خپله ۴۰ کلنه مېلمه پالنه په ښه توګه پای ته ورسوي او اجازه ورکړي چې افغان کډوال په خپله خوښه را ستانه شي.»
متقي همدا راز په خپلو خبرو کې وړاندې ویلي، مرستندویه بشري حقونو نړیوال سازمانونه له افغان کډوالو سره باید خپلو مرستو ته د تېر په څېر دوام ورکړي او له حقوقو یې دفاع وکړي.
متقي وايي، دغه مرستې باید په داسې ډول ترسره شي چې راتلونکي کې افغانان د خپل روزګار خاوندان وي او له اوسني اوضعیته ووځي.
هغه زیاتوي:« له نړیوالو ادارو هم مننه کوو چې کلونه یې د افغان مهاجرو لاسنیوی کړی او لایې هم کوي. هیله لرو، دغه مرستې په هېواد کې دننه او بهرنیو کمپونو کې ادامه ولري. په ځانګړې توګه راتلونکي ژمي کې ښه تدابیر ونیول شي.»
له دې سره د سیاسي چارو شنونکي هم غوښتنه کوي، چې د افغان کډوالو کوربه هېوادونه دې د کډوالۍ نړيوالو اصولو ته په ژمنتيا سره، د يادو کډوالو حقونو تامين تامين کړي.
د سياسي چارو شنونکی نجيبالرحمن شمال وايي: «زه هیله لرم د نړۍ په هېوادونو کې مېشت افغان کډوال د کوربه هېوادونو نظم او قوانین مراعات کړي ترڅو په جبري توګه د ایستلو زمینه برابره نه شي. د افغانستان اوسني شرایط له هېڅ امله د مهاجرانو پر ګټه نه دي او په راتګ سره به یې له ګڼو ستونزو سره مخامخ شي.»
د کډوالۍ نړیوالو قوانینو او اصولو پر اساس، د کډوالو کوربه هېوادونه باید له کډوالو سره ښه چلن ولري او ستونزو ته یې رسېدنه وکړي او ورسره زور زیاتی له نړیوالو قوانینو سر غړونه ده.
په دې وروستیو کې ایران او پاکستان کې کې د حکومت له لوري افغان کډوالو سره ناسم چلن کیږي، پر زوره یې له خپلو هېوادونو وباسي او همدا راز د قانوني اسنادو د نه لرلو په پلمه یې نیسي او زندانونو ته یې اچوي.
