د چين او امريکا ترمنځ د سياسي اختلافونو پر دوام اسلام آباد بې طرفي اختيار کړې او ډاډ يې ورکړی چې له واشنګټن او بېجينګ سره به يې اړيکې د شريکو ګټو په چوکاټ کې د متقابل احترام د اصل پر اساس دوام ولري.
خو تازه د امريکا بهرنيو چارو وزارت مرستيال جان بس د واشنټګن او اسلام آباد پر اړيکو سربېره د افغانستان په ګډون د سيمې پر امنيتي او سياسي وضعيت د بحث لپاره پاکستان ته رسېدلی.
د پاکستاني رسنيو د راپورونو له مخې، جان بس د خپلو ليدنو په لړ کې د پاکستان له بهرنيو چارو وزير او د دې هېواد د پوځ له لوی درستز سره د شريکو مسايلو ترڅنګ د افغانستان پر سياسي او امنيتي وضعيت غږېدلی.
دواړو لوریو له ترهګرۍ او سخت دریځۍ سره له مبارزې سربېره په سیمه کې د ټیکاو او سوکالۍ پر اهمیت هم ټینګار کړی.
د سیاسي چارو کارپوهان وايي، پاکستان تل د افغانستان پر وړاندې د لوېديځ لمنه نیولې او هڅه یې کړې چې له دې لارې خپلو موخو ته ورسېږي.
د دوی په باور، پاکستان لا هم په سیمه کې د لوېدیځ لپاره د اطلاعاتو ټولونې اصلي مرجع ده.
د سیاسي چارو کارپوه عزیز معارج وايي: « دا ښکاره خبره ده چې پاکستان د امریکا او ناټو غړیو هېوادونو د پروګرامونو پرمخ وړلو مجري هېواد دی او هغوی هم د سیمې او افغانستان په اړه خپلې پروژې پاکستان ته ورکوي. پاکستان د همدې لپاره جوړ شوی او تغذیه کېږي. همدا لامل دی چې امریکايي چارواکي پاکستان ته ډېر تګ راتګ کوي. دا لړۍ له پخوا راهیسې روانه ده او ادامه به لري.»
بله خوا، ځېنې نور بیا وايي، افغانستان لاهم د امریکا لپاره مهم دی او هڅه کوي چې له بېلابېلو لارو يې په اړه مالومات ترلاسه کړي او په دې توګه په افغانستان او سيمه کې خپل سياسي او پوځي نفوذ ته دوام ورکړي.
د سیاسي چارو کارپوه ډاکټر معین ګل څمکنی وايي: « دلته د امریکا موخې دا دي چې پاکستان له چین څخه را جلا کړي. امریکا په دې وروستیو کې د چین په هغو کمپنیو بندیز ولګاوه چې د پاکستان بالستیک توغندیو په جوړولو کې یې همکاري لرله. ښايي لوېدیځ داسې پلان هم ولري چې د افغانستان او پاکستان له لارې منځنۍ آسیا، ایران، چین او نورو هېوادونو ته ستونزې جوړې کړي.»
د امریکا بهرنیو چارو وزارت مرستيال داسې مهال پاکستان ته سفر کوي چې خیبرپښتونخوا او بلوچستان له سختو امنیتي ستونزو سره مخ دي.
ياد امريکايي چارواکي د پاکستاني طالبانو تحریک پر فعالیتونو اندېښنه څرګنده کړې او دغه ډله یې د سیمې لپاره ګواښ ګڼلی.
آزاد خبریا طاهر خان په دې اړه وايي: « له دې وړاندې د پاکستان د بهرنیو چارو وزارت ویلي وو چې په اسلام آباد کې به د امریکا دغه مرستیال وزیر د امریکا او پاکستان پر ګډو امنیتي اندېښنو خبرې کوي. د امریکا سفارت د ترهګرۍ پر وړاندې د مبارزې خبره وکړه او هم په دغو خبرو کې افغانستان د بحث یوه مهمه موضوع ده.»
له دې مخکې د امریکا د بهرنیو چارو وزارت ویلي ول چې د دې وزارت مرستيال به پاکستان ته د خپل سفر پر مهال دواړو هېوادونو ته پر متوجې امنیتي ګواښونو هم خبرې وکړي.
