افغان ولسمشر محمد اشرف غني نن سهار د یوه دولتي پلاوي پر مشرۍ د هرات وضیعت ارزولو په موخه دې ولایت ته تللی دی.
ولسمشر غني سره په دې سفر کې لومړی مرستیال امرالله صالح، د سیمه ییزو ارګانونو خپلواکې ادارې مشر شمیم کټوازی، ولسي جرګه کې د هرات د خلکو استازي او یو شمیر سلاکاران شامل دي.
د ولسمشرۍ ماڼۍ له لوري په خپره شوې خبرپاڼه کې راغلي،چې ولسمشر غني هرات ته په رسېدو ۲۰۷ ظفر قول اردو ته ولاړ او هلته یې له افغان امنیتي او دفاعي ځواکونو سره ناسته کړې.
په دې ناسته کې د هرات والي، د ظفر قول اردو قوماندان او نورو پوځي چارواکو د هرات امنیتي وضعیت په اړه و لسمشر ته راپور ورکړ.
ولسمشر همداراز هرات ته د سفر پر مهال له پخواني جهادي مشر اسماعیل خان سره هم لېدنه کړې.
ولسمشر غني داسې مهال هرات ته تللی، چې د دغه ولایت ګڼې ولسوالۍ وروستیو څو اونیو کې د افغان پوځیانو او طالبانو ترمنځ لاس په لاس شوې دي.