له افغانستان څخه دوحې ته د تللي پلاوي او د طالبانو د قطر د دفتر د مشرانو دوه ورځنۍ خبرې پرته کومې ملموسې موافقې او د اوربند په اړه له پرېکړې پرته پای ته ورسېدې.
دواړو خواوو د قطر په وخت د ماسخوتن په ۹ بجو د خپلو خبرو په پای کې یوه ګډه اعلامیه خپره کړه.
د طالبانو د قطر د دفتر ویاند د دې اعلامیې جزییات له رسنیو سره شریک کړي دي.
د دې اعلامیې پر اساس دواړو خواوو هوکړه کړې، چې د افغانستان د اوسنۍ لانجې د پای ته رسېدو لپاره به د یوې عادلانه او تلپاتې حللارې د موندلو هڅه کوي.
د ټولو افغان نارینه وو او ښځو ګټو او غوښتنو ته به د اسلامي اصولو په رڼا کې ځواب وايي او تر هغو به خبرو ته دوام ورکوي، چې یوه دایمي حللار وموندل شي.
د دواړو خواوو د پلاوو مشرانو د خبرو اترو د چټکتیا پر اړتیا د ټینګار ترڅنګ ویلي، چې په ټول افغانستان کې به د ملکي بنسټونو د ساتنې او د ملکي تلفاتو د مخنیوي لپاره هڅې کوي او د کورونا وایرس د مخنیوي لپاره به د واکسیناسیون د پرسونل د خوندیتوب لپاره مناسب اقدامات کوي.
