په تېرو درېیو کالو کې وزګارتیا د هېواد هغه لویه ستونزه او د ځوانانو د پرمختګ پر وړاندې ننګونه ده چې افغان ځوانان ورسره مخ دي او ځينې یې له هېواده کډه کولو ته اړ کړي دي.
د اطلاعات او کلتور وزارت د ځوانانونو چارو معین قاري محمد یونس راشد له شمشاد سره د لید په خپرونه کې وویل، سرپرست حکومت د ځوانانو روزنې ملاتړ ته ژمن دی او د ظرفیت لوړونې له ښوونیزو پروګرامونو ملاتړ کوي.
راشد ویلي، په تېرو دوه لسېزو کې د ځوانانو وړتیاوو لوړولو ته پاملرنه نه ده شوې.
د راشد په خبره، یوازې ځوانانو ته د تحصیل برخه کې پاملرنه شوې او په وینا یې، ځوانان باید خپلې وړتیاوې د هېواد په آبادولو او چوپړ کې وکاروي.
راشد زیاتوي: « زموږ ځوانان تحصیل وکړي خو د دې په ځای چې په دې سخو شرایطو کې له خپل هېواد سره پاتې شي، نورو هېوادونو ته خدمت کوي. زه ځوانانو ته وایم چې هېواد د مور حیثیت لري او زموږ مور له اشغال څخه وروسته د درملنې په حال کې ده او زامن یې باید خدمت وکړي. دا به ډېره بې ننګي وي چې یو زوی خپله مور د روغتون پر بستر پرېږدي او خپله د هوسا ژوند لپاره بهر ته ولاړ شي.»
راشد له هېواده د ځوانانو تېښته یوه غمیزه بولي، خو ډاډ ورکوي چې اسلامي امارت هڅه کوي د ځوانانو د وتلو مخه ونیسي.
د نوموړي په خبرخ، سرپرست حکومت د ځوانانو له استعداد څخه په هېواد کې د کار اخیستلو لپاره يوه اقتصادي طرحه جوړوي.
راشد په دې اړه وايي: « موږ د معینیت تر ټولو مهم هدف دا دی چې د ځوانانو لپاره کاري زمینې پیدا کړو او په دې برخه کې تر اوسه ښې لاسته راوړنې هم لرو.»
نوموړي د شمشاد د یوې پوښتنې په ځواب کې وویل، ځینې بهرني هېوادونه په لوی لاس له افغانستانه د لوستو ځوانانو تېښتې ته لار هواروي او په خپلو هېوادونو کې يې په فزیکي کارونو بوختوي.
نوموړی زیاتوي: « بهرنیان او زموږ دوښمنان د دې لپاره محاسبه کوي او په دې یې کار پيل کړی چې په هره ممکنه لاره تحصیل کړي ځوانان له افغانستان څخه وباسي. دوی له موږ جګړه وبایلله او اوس یې د فکري او اقتصادي جګړې تمرکز په دې راټول کړی چې افغان ځوانان او تحصیل کړي کادرونه خپلو هېوادونو ته جذب کړي.»
دا په داسې حال کې ده چې واک ته د دویم ځل لپاره د اسلامي امارت له رسېدو وروسته، په هېواد کې د وزګارتیا کچه تر بل هر وخت لوړه شوې.
په تېرو ۱۱ میاشتو کې له ایران او پاکستان څخه زرګونه ځوانان چې یادو هېوادونو ته د کار لپاره تللي وو، په زور او جبر له دغو هېوادونو را شړل شوي او دا لړۍ لا روانه ده.
