په ازبکستان کې د سوېلي او منځۍ اسیا د پیوستون نړیوال کنفرانس کې افغانستان، امریکا، ازبکستان او پاکستان د ډیپلوماټیک پلټ فارم پر جوړولو هوکړه وکړه.
د بهرنیو چارو وزارت واييي، د دې ناستې ډېری بحث، چې پر افغان سوله او اقتصادي همکارۍ وو، څلور واړو اړخونو په افغانستان کې تلپاتې سوله او ثبات د سیمه ییزو همکاریو د پراختیا لپاره مهم وباله او تړون یې وکړ، چې د سولې او سیمې اړیکې به د متقابلې همکارۍ پر بنسټ پیاوړې کوي.
د یاد وزارت ویاند ګران هېواد وايي:« په دې ناسته کې افغانستان، امریکا ازبکستان او پاکستان هوکړه وکړه، چې له دې څلور اړخیز جوړښته به د سیمه ییز اتصال د مرکزي اسیا او سوېلي اسیا هېوادونو په تړاو په سلسله کې اعظمي ګټه پورته شي.»
ګران هېواد وايي، د تاشکند ناستې د تماس کمېټې غړو د افغان سولې او ثبات څخه ملاټر وکړ او پر طالبانو یې وغږ وکړ،چې له تاوتریخوالي لاس واخلي او د سولې لاره غوره کړي.
ګران هېواد زیاته کړه:« د همکاریو د سازمان د کمېټې په ناسته کې دې کمېټې ډېر اغېزمنه مشترکه اعلامیه خپره کړه،چې د سولې او ثبات نه ملاټر کېږي او پر طالبانو یې غږ وکړ، چې د تاوتریخوالي کچه راټيټه کړي.»
اخوا د اقتصادي چارو شنونکی اصف ننګ بیا دغه ډول ناستې پر افغان سولې سربېره، د سیمې او نړۍ هېوادونو سره د افغانستان د اړیکو پراختیا لپاره مهمې او ګټورې بولي.
ننګ زیاتوي:«افغانستان په دې ورځو کې له ۲ تر ۳ میلیارده ډالرو پانګې ته اړتیا لري،چې ۷۰ سلنه یې نړۍ ورکوي، خو په سوله ییز بهیر کې، کله چې سوله تامین کېږي، کله چې موږ د سولې پر لور دغه حرکت پیل کړی، په دې کې باید د نړۍ او سېمې مشارکت په اقتصادي لحاظ او د نړۍ مشارکت د تمویل پر لحاظ دا باید تر ۱۰ میلیارد ډالرو پورې په کال کې ورسېږي، ترڅو موږ پر دغه حالت باندی برلاسي شو.»
د سیمه ییز اتصال او پیوستون دوه ورځينۍ ناسته،چې د ازبکستان په کوربتوب تاشکند کې جوړه شوې وه، افغان ولسمشر غني او د نړۍ څلوېښتو هېوادونو او سازمانونو استازو په کې ګډون کړی و.
