د کندهار ولایت په سپين بولدک ولسوالۍ کې د جمعې پر ورځد رویټرز خبري آژانس خبریال دانش صدیقي وژنې د نړۍ پر کچه ګڼ غبرګونونه راپاولي دي.
ملګرو ملتونو، یوناما، افغان ولسمشر محمد اشرف غني، افغان او بهرنیو خبریالانو او د رسنیو ملاتړو بنسټونو د صدیقي وژنه لویه ضایع بللې او د دې پيښې د څیړنو غوښتنه یې کړې ده.
د ملګري ملتونو عمومي منشي انټونیوګوترس وايي:« په افغانستان کې د هندي انځور اخېستونکي خبریال دانش صدیقي په وژنه خواشیني څرګندوو او په جګړه ځپلي هېواد افغانستان کې د هغه او د نورو خبریالانو د وژنو قضیوو د څېړنو غوښتنه کوو.»
په افغانستان کې د یوناما دفتر:« افغانستان کې داخلي او بهرني خبریالان له مخ پر زیاتیدونکي ګواښ سره مخ دي. موږ ټولو خبریالانو او د دانش صدیقي کورنۍ سره ژوره خواخوږي څرګندوو. افغان حکومت باید د خبریالانو ژوند خوندي کړي او دغه قضیې وڅېړي.»
افغان ولسشمر غني هم پر دغې پېښې خواشیني ښوولې او ټېنګار یې کړی، چې افغان حکومت د بیان ازادۍ لارویانو د ژوند خوندیتوب ته ژمنتیا لري.
ولسمشر غني زیاته کړه:« د طالبانو ډلې د تاوتریخوالي د خبري پوښښ پر مهال د رویټرز خبري اژانس پر هندي الاصله خبریال او انځور اخېستونکي د ترویستي برید له امله ډېر خواشینی شوم. د نوموړي او رسنیو کورنۍ ته تسلیت وړاندې کوم او یو وار بیا د بیان ازادۍ او د ازادو رسنیو او خبریالانو ساتنې ته د دولت ژمنتیا څرګندوم.»
بل پلو د افغان خبریالانو د خوندیتوب کمیټې بیا د صدیقي وژنه لویه ضایعه بللې او خوشیني یې پرې څرګند کړې ده.
د کورنیو چارو وزارت ادعا کوي، چې نوموړی د طالبانو له خوا په نښه شوی،هغه څه چې طالبان یې مسولیت نه مني.
دغه راز د نړۍ پر کچه پېژندل شوي څېرو او چارواکو د دانش مړینه لویه ضایعه بللې ده.
په خواله رسنیو کې د هند خبریالانو د هغه انځورونه پورته کړي او د دانش لپاره یې د غمشریکۍ ځانګړي مراسم ترسره کړي دي.
دانش صدیقي، هغه هندې خبریال و، چې د رویټرز رسنۍ خبري آژانس سره یې خبریالي کوله او افغانستان کې د جګړو پر کرښو به یې رپوټونه او مستندونه جوړول.
صديقي د جمعې په ورځ د کندهار ولایت په سپین بولدک کې ولسوالۍ کې د وسله والو طالبانو اوافغان حکومت ترمنځ د نښتې پرمهال ووژل شو.