ولسي جرګې له پاکستان غوښتي، چې د افغانستان په اړه د غیر اسلامي څرګندونو مخه ونیسي.
د پاکستان د ولسي جرګې غړي مفتي عبدالشکور ویلي، افغانستان کې د طالبانو جګړه د پاکستان د ساتنې لپاره ده او پاکستان ته په کار ده، چې د طالبانو ملاتړ وکړي.
د افغانستان ولسي جرګې د نوموړي دا څرګندونې د اسلام له دایرې او انساني خواخوږۍ لرې بللې دي.
د ولسي جرګې له لوري په خپرې شوې اعلامیه کې راغلي، چې دوی د عبدالشکور یادې څرګندونې د ډیپلوماټیکو اصولو خلاف بولي، په کلکو ټکو یې غندي او د افغانستان په چارو کې یې د پاکستان ښکاره لاسوهنه بولي.
ولسي جرګه وایي، افغانستان اسلامي جمهوري نظام لري او هیچاته اجازه نه ورکوي، چې په کورنیو چارو کې یې لاسوهنه وکړي.
د افغانستان ولسي جرګې د عبدالشکور څرګندونې د دواړو هېوادونو په زیان بللي او د پاکستان له حکومت او ملي شورا یې غوښتي، چې د دې ډول غیر اسلامي او غیر انساني څرګندونو او کړنو مخه دې ونېسي.
