د پاکستان د کورنیو چارو وزیر شیخ رشید ويلي، امنیتي مسؤلین د دوو هغو ټکسي چلوونکو سره په اړیکه کې دي، چې له موټره یې په هغه ورځ کار اخیستل شوی و.
ویل کېږي، د پاکستان لومړي وزیر عمران خان، شیخ رشید ته امر کړی، چې د افغانستان د سفیر د لور په پېښه کې لاس لرونکي کسان باید په ۴۸ ساعتونو کې ونیول شي او د پېښې ټول پټ اړخونه یې څرګند شي.
عمران خان دغه راز ویلي، باید ټولې قانون نافذوونکې ادارې د دې پېښې په اړه پلټنو ته لومړیتوب ورکړي او دا یقیني کړي، چې د مجرمینو په نیولو کې له ټولو امکاناتو کار اخلي.
بل پلو د پاکستان د بهرنیو چارو وزارت ویلي، د افغان سفارت او د سفیر امنیتي تدابیر یې زیات کړي دي.
