د طالبانو د قطر دفتر مشر ملا عبدالغني برادر له ورغلو افغان سیاسیونو سره په ناسته کې ویلي، د یو خپلواک او مرکزي نظام لپاره باید ټولې خواوې له ځان غوښتنې او شخصي ګټو تېر شي، څو یو پر بل بې باوري او بې اعتمادي له منځه لاړه شي.
ملا برادر ویلي، د ستونزې د حل یوازینۍ لار پیاوړی، مرکزي او خپلواک اسلامي نظام جوړېدل دي.
د نوموړي په وینا، بین الافغاني مذاکرات له نږدې لسو میاشتې راهیسې دوام لري، خو ځینې ستونزې شته، هغه ډول چې هیله کېده پرمختګونه نشته، خو بیا هم ورته ناهیلي نه دي.