په کابل کې د سولې لپاره د ځوانانو ملي کنفرانس جوړ شوی او ګډونوال وايي، د روان وضعيت تر ټولو لوی زيان به هغو کسانو ته ورسېږي چې د بې طرفۍ په پلمه بې تفاوتي کوي.
دوی وايي، اوس د بې طرفۍ وخت نه دی او محافظه کاران به ځان او هېواد ته ګټه ونه کړي.
ګډونوالو د افغانستان روان وضعيت تر بل هر وخت کړکېچن وبلله او ټینګار یې پر دې وکړ، چې خلک دې د بې طرفۍ په بلمه نه بې تفاوته کېږي.
دوی زیاتوي، چې د نیابتي جګړې دوام او په داسې وضعیت کې، چې پاکستان د افغانستان جګړې ته هره ورځ جنګیالي رالېږي او په ښکاره یې د جسدونو تابوتونه لېږل کېږي، ولې محافظه کاري او بې طرفي اختیار شي.
د سولې په چارو کې د دولت وزارت سرپرسته ډاکټر عالمه وايي: « هره ورځ د پاکستاني عسکرو جسدونه اخوا اړول کېږي. دې وخت کې هېڅوک حق نه لري چې ووايي، موږ بې طرفه يوو، بې غرضه يوو، جامعه مدني ټولنه چېرته ده، ولې خپل صفونه نه پیاوړي کوي.»
د ملي روغې جوړې عالي شورا مرستيال عطا الرحمن سليم وايي:« که خلک بې تفاوتي اختیار کړي، د مسووليت احساس ونه کړي، خپل مسووليت ادا نه کړي، پيغمبر ص وايي، کله چې عذاب راشي نو ټول وچ او لانده سوځوي.»
د کنفرانس ګډنوال وايي، دا چې اسلامي نړۍ د افغان جګړې شرعي دليل رد کړی، اوس د جګړې لپاره نور سياسي دليلونه لټوي.
ځوانان چې د هېواد اويا سلنه نفوس تشکيلوي، د سولې په برخه کې د خپلې ونډې غوښتنه کوي.
د ځوانانو چارو معين ادريس الکوزی وايي:« اجتماعي عدالت همدا ځوانان پلی کوي، نو که چېرته اوس وخت کې د ځوانانو نظر وانه خېستل شي، بيا يې څوک پلي کوي او ممکن بيا ماته وخورو.»
د افغانستان ميډيوتيک مشر عاطف فقير زاده وايي:« د دې لپاره چې سوله دايمي او عادلانه وي،د ځوانانو، ښځو او سړيو ګډون مهم او اساسي دی.»
ياد کنفرانس چې، کابل کې د المان سفارت پر همکارۍ جوړ شوی دی، افغانستان کې یې د سمدستي جګړې د درېدو غوښتنه وکړه او د افغانستان او المان په اوږودمهاله ملګرتيا يې ټېنګار وکړ.
په کابل کې د المان چارسمبالی وايي:« جګړه د ځوانانو لاسته راوړنې له منځه وړي.موږ له تاسو سره همکار يوو. جګړه بايد ودرېږي. د افغانستان او المان دوستي چې له سلو کالو زياته موده کېږي، نوره به هم پياوړې او غښتلې شي.»
د سولې لپاره د ځوانانو ملي کنفرانس په لسو ولايتونو کې د ځوانانو نظرونه ټول کړي وو او د يوه هوکړه ليک په خپراوي کابل کې پای ته ورسېده.
