د ملکي هوايي چلند اداره وايي، د فرانسې د تالیس فرانسوي شرکت درې رادارونه کابل ته راورسېدل.
د یادې ادارې ویاند محمد نعیم صالحي وايي، کابل کې به تر راتلوونکې درې میاشتو پورې دغه درې رادارونه کابل کې او تر ۲۰۲۳ زېږدیز کال پورې به د افغانستان په ۱۲ سیمو کې رادارونه ځای پر ځای شي.
د صالحي په وینا، دغه پروژه د ۱۱۲ میلیون یورو په ارزښت پلي کېږي.
د ملکي هوايي چلند ادارې د مالوماتو له مخې، د رادارونو د عملي کار له پیل کېدو سره د افغانستان د هوايي حریم واک د دغه هېواد حکومت په واک کې کېږي.
تالیس په فرانسه کې یو دولتي شرکت دی،چې د هوايي پرمختګ ماشینونو په تولید کې نامتو نوم لري.
چارواکي وايي، افغانستان ته یې جوړ کړي رادارونه کولائ شي، له صفري ټکي نه تر ۲۶ زره فټو پورې لوړه فضاء وڅاري.