د کار او ټولنیزو چارو وزارت چارواکو د خپلو یو کلنو لاسته راوړنو راپور له رسنیو سره شریک کړ. د دې وزارت چارواکي وايي، خلکو ته د کاري فرصتونو رامنځته کولو په برخه کې یې هڅې زیاتې کړي او لاسته راوړنې هم لري.
د دوی په خبره، په تېر یوه کال کې ۱۱۸ زره ۷۵۵ تنه افغانانو او ۳ زره ۳۸۱ تنه بهرنیانو ته د کار جوازونه ورکړل شوي دي.
د کار او ټولنیزو چارو وزارت د کار مرستیال محمد زاهد احمدزی وايي: « د کار او ټولنیزو چارو وزارت د هېواد خپلو وګړو او بهرنیانو ته ۱۲۲ زره ۱۳۶ تنو ته د کار جوازونه وېشلي دي.»
د دغه وزارت د چارواکو په خبره، روان کال د وزارت په هڅو د کاري فرصتونو رامنځته کولو په موخه د کار ملي کنفرانس جوړ شو او پرمهال یې له ۱۵ بېلابېلو وزارتونو او ادارو سره هوکړه لیکونه لاسلیک شوي چې له لارې به یې ۱.۵ کسانو ته د کار زمینه برابره شي .
د کار او ټولنیزو چارو وزارت ویاند سمیع الله ابراهیمي وايي: « په هېواد کې د بېکارۍ کچې راټیټولو په موخه د ارګ په سلام خانې ماڼۍ کې د کار ملي کنفرانس جوړ شو او په کې له ۱۵ دولتي ادارو سره تفاهم لیکونه لاسلیک شول. د دغو تفاهم لیکونو له مخې په راتلونکو پنځو کالو کې په مستقیمه او غیر مستقیمه توګه ۱.۵ میلیون تنو ته د کار موندلو ژمنې واخیستل شوې او دا یوې بې مخینې کار وشو.»
د دغه وزارت سلاکار رحیم الله صراح بیا بهر ته د افغان کارګرو د استولو خبره کوي او وايي، بهرنیو هېوادونو ته د افغان کارګرانو د لېږلو پرپلان کار روان دی او په دې تړاو له قطر، روسيې او متحده عربي اماراتو سره خبرې شوې او د هوکړه لیکونو له لاسليکولو وروسته به افغان کارګر یادو هېوادونو ته واستول شي.
هغه زیاتوي:« عربي متحده اماراتو، ترکیې، ایران، قطر او سعودي عربستان هېوادونو ته د مسلکي او نیمه مسلکي افغان کارګرو د استولو په اړه د کار او ټولنیزو چارو وزارت د مشرتابه پلاوي د سفرونو تنظیمولو په موخه له بهرنیو چارو وزارت سره ناستې شوې دي.»
په ورته وخت کې، د کار وزارت چارواکو د تېر کال پرمهال د خپلو لویو لاسته راوړنو په برخه کې وویل، په تېر یوه کال کې څه باندې ٧٤ زرو تنو ته د مسلک او مهارتونو په برخو کې د زده کړو زمينه برابره شوې، له ۸۰ زرو زیاتو کسانو ته په نورو بېلابېلو برخو کې د زده کړو زمينې چمتو شوې او دا مهال څه باندې ۱۰ زره ماشومان په مسلکي تعلیمي پروګرامونو کې پر زده کړو بوخت دي .
