د افغان سولې لپاره د امریکا ځانګړي استازي زلمي خلیلزاد تېره ورځ په تاشکند کې یوه سیمه ییز کنفرانس کې هیله څرګنده کړې، چې په راتلونکي لوی اختر کې به د افغان حکومت او طالبانو ترمنځ اوربند وشي.
خلیلزاد ویلي، د امریکا او طالبانو ترمنځ د سولې له هوکړې د طالبانو تعبیر دا دی، چې سیاسي هوکړه باید له اوربند مخکې وي او دواړه باید په یوه وخت کې اعلان شي، خو هغه ویلي، اوس مهال د اختر په ورځو کې د لنډمهال لپاره د اوربند امکان شته.
هغه ویلي، که په اختر کې پر اوربند هوکړه وشي، امکان لري چې پایله یې په اوږد مهال کې د تاوتریخوالي کمېدل وي.
نوموړي یو ځل بیا ویلي، چې طالبان په افغانستان کې د جګړې له لارې پوره بریا ته نه شي رسېدی او خبرداری یې ورکړی، چې که له افغان حکومت سره د سولې یوې هوکړې ته ونه رسېږي، متحده ایالات به د طالبانو په مشرۍ د زور له لارې واک ته رسېدلی دولت په رسمیت ونه پېژني.
