د کورنیو چارو وزارت امنیتي معین ستر پاسوال عبدالرحمان رحمان وايي، پر طالبانو رحم کول له خپلې خاورې سره خیانت دی.
نوموړي دغه څرګندونې نن کندهار ته د خپل سفر پر مهال کړي.
هغه د کندهار له امنیتي او ملکي چارواکو سره د لیدنې پر مهال وویل، کندهار د خپل تاریخي، سیاسي، فرهنګي او اقتصادي ارزښت لري، طالبان به خپلو موخو ته پرېنږدي؛ بلکه ورته به سخته ماته ورکړل شي او نور به ورباندې هیڅ رحم ونه کړي.
هغه زیاته کړه، کندهار ته د ولسمشر محمد اشرف غني د لارښوونې سره سم راغلی، ترڅو د نظامي قوتونو ترمنځ لا ښه همغږي رامنځته، د دښمن د ځپلو په موخه ځانګړي پلانونه تطبیق، هوايي قوتونه منسجم، او تر څنګ یې د کندهار نظامي شورا ستونزو ته ځانګړې پاملرنه، له لاسه وتلو سیمو بیرته نیولو په موخه د قوتونو منظمول او د مجازاتو او مکافاتو اصل د تطبیقولو تر څنګ انسجام رامنځته کول دي.
کندهار ته د دغه لوړ پوړي امنیتي چارواکي سفر پر داسې مهال دی، چې دغه ولایت کې طالبانو ګڼې ولسوالۍ نیولي او دا مهال د ښار په ځینو سیمو کې له حکومتي سرتېرو سره په جګړه بوخت دي.
