فراه؛ د طالبانو برید ۴۰ ملکيان او پوځيان وژلي
د فراه ولایت خاکسفید ولسوالۍ کې د ښځو او ماشومانو په ګډون څلویښت سیمه يېزپولیس د طالبانو په برید کې وژل شوي دي.
د دې ولایت د ولایتي شورا غړی داد الله قانع وايي، طالبانو تیره شپه د خاکسفید ولسوالۍ اړوند د خوست سیمې د سیمه يېزو پولیسو پرپوستو ډله يېز برید کړی دی.
هغه وايي، طالبانو یاده سیمه خپل ترکنټرول لاندې راوستلې چې پرمهال یې ترڅلویښتو پوري سیمه يېز پولیس، ښځي او ماشومان وژل شوي.
نوموړی وايي، طالبانو د یادو پولیسو ګڼ شمیر وسلې اومهمات هم ترلاسه کړي دي.
هغه وايي، طالبانو یاده سیمه کې د خلکو کورونو ته هم اور ورته کړی دی.
دادالله قانع ادعا کوي چې دغه سیمه کې طالبانو د خلکو کورونوته هم اورورته کړی.
د فراه امنیه قومندان فضل احمد شیرزاد هم مني چې دغه سیمه د طالبانو ترکنټرول لاندي راغلی.
نوموړی وايي، سیمه کې سیمه يېزو پولیسو ته مرګ ژوبله اوښتې خو کره شمیره يې په لاس کې نلري.
دا په داسې حال کې ده چې تیره شپه وسله والو طالبانو د فراه ښار پر دروازو ډله يېز بریدونه وکړل.
د فراه د ولایتي شورا غړی دادالله قانع وايي، جګړې ترشپې ناوخته دوام وکړ چې پرمهال يې طالبانو د برنګتوت او باغپل سیمو چې د فراه مرکز اړوند کیږي دوې پوستې سقوط کړي.
هغه وايي، دغو پوستو کې نهه پولیس وژل شوي او یوشمیر نورټپيان دي.
دغه راز طالبانو تیره شپه د بالابلوک ولسوالۍ د توت په سیمه کې هم د پولیسو یوه پوسته سقوط کړې چې څلور پولیس په کې وژل شوي او پنځه نور ټپیان دي.
د فراه ولایتي شورا خبرداری ورکوي که چېرې مرکزي حکومت د دې ولایت د امنیت لپاره جدي اقدام ونه کړي نو ښايې له سقوط سره مخ شي.
څو میاشتې وړاندې هم طالبانو د فراه پرمرکز د څو لورو ډله يېز برید وکړ چې آن ښار ترمرکزه ورسیدل.
د طالبانو ویاند قاري یوسف احمدي په خاکسفید کې حکومت ته د درنې مرګ ژوبلې د اړولو ادعا کوي خو د خپل لوري د ښځو او ماشومانو وژل کیده او د کورونو سوځیدل په کلکه ردوي.
