افغان ولسمشر غني د یو لوړ پوړي دولتي پلاوي په مشرۍ د منځنۍ او سوېلي اسیا د سیمه ییز اتصال فرصتونو ګډ کنفرانس کې د ګډون لپاره په دوه ورځني رسمي سفر ازبکستان ته رسېدلی دی.
د ولسمشر ویاند لطیف محمود وايي، ولسمشر غني به یاد کنفرانس کې له وینا سربېره د ازبکستان ولسمشر سره پر دوه اړخېزو اړیکو سربېره په مهمو مسایلو خبرې کړي دي.
محمود وايي، ولسمشرغني لومړی له خپل ازبکستاني سیال سره پر دوه اړخیزو اړیکو سربیره پر ځینو مهمو مسایلو خبرې کړي دي.
په ورته وخت کې هغه وايي، ولسمشر غني به د یو شمېر نورو هېوادونو له استازو سره هم لېدنې ولري.
محمود زیاتوي:« د تاشکند کنفرانس د افغانستان لپاره مهمه دی او له هغه ځایه چې افغانستان په سوېلي اسیا کې استراتيژیک موقیعت کې قرار لري او نه یوازې ځانته بلکې د سیمې هېوادونو ته هم د اهمیت وړ دی.»
محمود وايي، دا کنفرانس د افغانستان لپاره مهم دی او په خبره یې افغانستان د مرکزي او سوېلي اسیا په نښلولو کې مهم رول لري.
هغه زیاته کړه:« افغانستان د سیمه ییز دهلیز او څلورلارې په توګه کولی شي، منځنۍ اسیا د سوېلي اسیا په اتصال کې مهم رول ولوبوي.»
که څه هم دې ناستې ته تمې زیاتې دي،چې غړي هېوادونه به افغان ولسمشر سره د دوه اړخیزو اړیکو، همکاریو او مرستو ژمنې تازه کړي، خو د سیاسي چارو تحلیل کوونکي زیات باوري نه دي،چې له دې کنفرانسه دې زیات څه ترلاسه شي.
د سیاسي چارو تحلیل کوونکی زیارمل نازکمیر وايي:« د افغانستان اوسني وضیعت ته په کتو د افغانستان لپاره کومه لاسته راوړنه نه لري او باید له دې کنفرانس څخه د ګټې اخېستنې په توګه باید ولسمشر د سولې برخه کې سیمه ییزو هېوادونو ملاټر جلب کړي، ځکه دغو هېوادونو ته طالب استازو هم سفر درلوده.»
د منځنۍ او سوېلي اسیا په دې کنفرانس کې ډېری بحث پر اقتصادي راکړې ورکړې کېږي، چې افغانستان به د څلور لارې په توګه مهم رول ولوبوي او مرکزي اسیا به له سوېلي اسیا سره وصل کړي.
دغه کنفرانس چې د منځنۍ او سوېلي اسیا، د سیمه ییز اتصال، فرصتونو او ننګونو ترنامه لاندې جوړ شوی، د ۴۰ هېوادونو او نړیوالو سازمانونو استازي په کې ګدون کوي.