د پاکستان د بهرنیو چارو وزیر شاه محمود قریشي له خپل افغان سیال سره په لیدنه کې له ترهګرۍ سره پر ګډې مبارزې ټینګار کړی،خو دغه څرګندونې یې دلته توند غبرګونونه له ځان سره لري.
د سیاسي چارو یو شمېر شنونکي وايي، پاکستان د افغانستان لسیزې بحرانونو کې ثابت شوی،چې دوه مخی سیاست کوي او دلته د جنګېدونکو ډلو تر شا درېدلی دی.
دوی وايي، نور پر پاکستان باور نه دی په کار او افغان حکومت باید نور د اسلام په دې تېراېستونکو خبرو تېر نه وځي.
دوی زیاتوي، د پاکستان ملکي حکومت هېڅ ډول صلاحت نه لري،چې له کابل سره خپلې کړې ژمنې عملي کړي، د دغه هېواد پوځ او څارګره اداره ده، چې په افغانستان کې جګړه مارې ډلې پرشا ډبوي او په خپله خاوره کې یې پټن ځایونه او روزنیز کمپونه ورکړي دي.
دولسي جرګې غړی ګل رحمان همدرد وايي:« د پاکستان تېرو ژمنو ته په کتو څه چې وايي او هغه څه چې عمل پرې کوي، سره توپیر لري، خو د افغان حکومت د مذاکراتو او دیپلوماسۍ دروازه تل خلاصه ده. اوس پکار دا ده،چې ټول اړخونه پر پاکستان فشار راوړي،چې د افغانستان پر وړاندې له خپل اوسني سیاست لاس واخلي او جګړې ته لمن وهل د پاکستان په ګټه هم نه دي.»
د سیاسي چارو شنونکی اسدالله ندیم په دې باور دی، چې افغانستان د پاکستان لپاره مهم دی او د دغه هېواد پوځي برخه او سیاستوال غواړي، چې په کابل کې د دوی د خوښې حکومت حاکم وي.
ندیم زیاتوي:« پاکستان د افغانستان په تړاو تدوین شوی او تعریف شوی سیاست لري او د افغان سیاستوالو په څېر نه دي،چې د وخت په تېرېدو سره یې د پاکستان پر وړاندې سیاست بدلون کوي، نو ځکه افغانستان پاکستان لپاره فوق العاده مهم اهمیت لري.»
د ولسي جرګې غړی ګل رحمان همدرد وايي، افغان حکومت بیا له تېرو شلو کلونو راهیسې همدا یوه هڅه کړې،چې له ګاونډي پاکستان سره ښې او پر دوه اړخیزو همکاریو ولاړې اړیکې ولري، خو دغې هڅې بیا کومه پایله نه ده ورکړې،ځکه اسلام اباد د کابل په تړاو خپل واحد ستراتیژیک عمق لري .
همدرد زیاته کړه :« افغان حکومت او افغان سیاسیونو تل دا هڅه کړې،چې له پاکستان سره دښه ګاونډیتوب چپټر خلاص کړي او له دوي سره تګ راتګ ولري، ځکه دا جغرافیه د بدلون وړ نه ده،خو متاسفانه چې د پاکستان ملکي حکومت صلاحیت نه لري.»
په تیرو دوه لسیزو کې دا لومړی ځل نه دی،چې اسلام اباد له کابل سره یوځای د ترهګرۍ پر وړاندې پرګډې مبارزې ژمنه کوي،خو د عملي کیدو لپاره پاکستان لا تر اوسه پوررې کوم ګام نه دی پورته کړی.
