په کابل کې یو شمېر مدني فعالان او د ښځو حقونو مدافعین راټول شوي او وايي، د طالبانو له لوري روان تاوتریخوالي اندېښمن کړي دي.
مدني فعالاني وايي، که طالبان غواړي، د جګړې او زور له لارې پر افغانانو حاکم شي او پر ښځو محدودیتونه وضع کړي، نو بریالي به نه شي.
دوی زیاتوي، که طالبان په دې فکر وي،چې له خپلو پخوانیو ذهنیتونو سره یو ځل بیا ښځې له خپلو حقونو بې برخې کړي او تیارې پېړۍ ته یې ور وګرځي، دا ناشونې ده.
د اصلاح غوښتونکې ګوند مرستیاله حسینه راتب وايي:« پر طالبانو غږ کوم، که تاسې غواړئ،په زور سیاست وکړئ،نو سیاست پر زور نه کېږي. موږ هغه پخوانۍ ښځې نه یو، چې ستاسې د ظلم پ وړاندې به غلي پاتې شو.»
سره له دې چې امریکا او متحدینو یې په افغانستان د شل کلن مهم پوځي ماموریت د ختمېدو پرېکړه کړې، خو دلته لا هم مخ امریکا او نړیوالې ټولنې ته اوړي.
مدني فعالانې او د ښځو حقونو مدافعین وايي، امریکا او نړیوال دې پر طالبانو فشار راوړي، چې روان تاوتریخوالي ته د پای ټکی کېږدي.
محمد زمان آرزومند مدني فعال وايي:« که تاسې غواړئ،چې پر افغانانو حاکم شئ، نو د افغانستان ښکلا په بېلابېلو قومونو کې ده، پرېږدئ چې هر فرد په هرې آیډیالوژۍ او باور چې لري یې ژوند وکړي.»
پر طالبانو د غونډې ویناوالو بل غږ دا و،چې جګړه د حل لار نه ده، دوحه کې د سولې درېدلې خبرې پیل کړئ او پر ملت رحم وکړئ.
مدني فعاله فرحناز فرحت وايي:«له طالبانو مو غوښتنه دا ده،چې د مذاکراتو میز ته را وګرځي او د خبرو له لارې مخته ولاړ شي.»
مدني فعال شیر محمد استوار وايي: « موږ د جنګ له ټولو اړخونو او دولت پلوي او د دولت مخالفو سیاسونو غواړو،چې په دې ملت دې نور رحم وکړي او جګړې ته دې د پای ټکی کېږدي.»
له هیواده د بهرنیو ځواکونو له وتلو وروسته په شااوخوا نهه ویشت ولایتونو کې جګړه روانه ده،چې تر ټولو زیات قربانیان یې ښځې او ماشومان دي.
ملګرو ملتونو هم د افغانستان وضعیت په تړاو اندېښنه ښودلې ده او زیاته کړې یې ده،چې د تاوتریخوالي دوام به دغه هېواد کې د انساني ناورین لامل شي.
