د اوبو چارو تنظیم ملي ادارې ویلي، د هرات په کرخ ولسوالۍ کې د پاشدان د اوبو بند جوړېدو چارې له ناامنیو سربېره روانې دي او ۸۵ سلنه بشپړې شوي.
د مالوماتو له مخې، دا بند د اوبو مدیریت، د کرنیزو ځمکو خړوبولو، د موسمي سیلابونو کنټرول، د څښلو د پاکو اوبو تنظیم او هېوادوالو ته د کار موندلو په موخه جوړېږي.
د پاشدان د بند د جوړېدو کارونه نږدې ۱۰ کاله مخکې پيل شوي او ټاکل شوې ده،چې یو ۱۱۷ میلیونه امریکایي ډالر لګښت پرې راشي.
د پاشدان بند تر جوړېدو وروسته به هلته ۵۴ میلیونه متره مکعب اوبه زېرمه شي او دوه مېګا واټه برښنا به تولید کړي.