له شپږم ټولګي پورته د نجونو پرمخ د ښوونځیو او پوهنتونونو پر دروازو تړل کېدو باندې له زرو ورځو ډېر وخت تېرېږي خو لاهم په دې اړه کورني او بهرني غبرګونونه دوام لري.
په تازه غبرګون کې د پاکستان د بهرنیو چارو وزارت ویاندې زهرا بلوچ یوې خبرې ناسته کې ویلي، که د افغانستان سرپرست حکومت چارواکي غواړي چې هېواد یې له هره اړخه پرمختګ وکړي، نو اړتیا ده چې ښځو ته د زده کړو او کار اجاز ورکړي.
د بلوچ په خبره، په افغانستان کې د ښځو حقونو په تړاو د پاکستان دریځ روښانه دی او هغه دا چې دوی افغان ښځو لپاره زده کړې او کار غواړي.
بلوچ زیاته کړې:« ټول نارینه او ښځینه برابر د زده کړو حق لري؛ لکه څنګه چې د پاکستان په اساسي قانون کې هم راغلي چې د ښځو حقونو ته باید پام وشي، نو موږ پر همدې اساس په افغانستان کې هم ښځو ته د کار او زده کړو د برابر حق غوښتونه کوو.»
د پاکستان بهرنیو چارو وزارت ویاندې همدارنګه یو ځل بیا ادعا کړې چې د افغانستان له خاورې پاکستان ته د ټي.ټي.پي په ګډون یو شمېر نورې وسله والې ډلې ور اوړي او هلته بریدونه کوي.
بلوچ زیاته کړې: « د ټي.ټي.پي په اړه یوازې پاکستان اندېښنه نه لري بلکې د ملګرو ملتوو تازه راپور هم دغه فعالیتونه د افغانستان له خاورې ښودلي دي. ملګرو ملتونو ویلي، ټي.تي.پي په افغانستان کې له افغان طالبانو او القاعده شبکې څخه عملیاتي او لوجسټیکي ملاتړ تر لاسه کوي.»
په ورته مهال د سیاسي چارو کارپوهان وایي، د ښوونځیو او پوهنتونونو د بند پاتې کېدو په اړه نه پاملرنه به ناوړه پایلې ولري.
دوی له سرپرست حکومته غواړي چې له شپږم ټولګي پورته د نجونو پر مخ د ښوونځیو او پوهنتونونو دروازې خلاصې کړي.
د سیاسي چارو کارپوه محمد سلیم پیګیر وايي: « پاکستان زموږ په کورنیو چارو کې د لاسوهنې حق نه لري او د خپل هېواد چارې دې سمبال کړي. پاکستان هغه مهال لا موجود نه و چې دلته افغانستان کې نجونو ښوونځي او پوهنتونونه لرل. نن د افغانستان ټول خلک دا غوښتنه کوي چې نجونو او ښځو ته دې د زده کړو او کار اجازه ورکړل شي.»
دا په داسې حال کې ده چې وړمه ورځ د افغانستان لپاره د امریکا سفارت وویل ۸۰ سلنه افغان نجونې له زده کړو بې برخې دي.
د دوی د شمېرو له مخې، په ټول افغانستان کې ۲.۵ میلیونه نجونې زده کړو ته لاسرسی نه لري.
که څه هم د سرپرست حکومت چارواکي د پاکستان د بهرنیو چارو وزارت د تازه څرګندونو په تړاو څه نه وایي، خو په تېر کې یې بیا بیا ویلي چې د افغانستان ښځو ته یې د کار او زده کړو حق ورکړی او هیچاته اجازه نه ورکوي چې د افغانستان له خاورې نورو ته زیان ورسیږي.
