په دایکندي کې تشریفاتي سرتېري د د دې ولایت د نوي والي مراد علي مراد د هرکلي لپاره په تمه ول، خو د نوي والي الوتکه په هوا کې بېرته کابل ته راغوښتل شوې او ان دایکندي کې ورته د کیناستو وخت هم نه دی ورکړل شوی.
د مراد علي مراد د معرفي کېدو لپاره له هغه سره یو شمېر وکیلانو هم ملتیا کوله،چې په یوه الوتکه کې ورسره د دایکندي پر لوري روان وو.
د ولسي جرګې غړی علي اکبر جمشیدي وايي:« په لاره کې وو، چې زنګ راغی او ورته یې وویل، اړیکه د سیمه ییزو ارګانونو څخه نیول شوې او مراد علي مراد معرفي نه کړئ، چې یو بل ځای ته یې معرفي کوي.»
د سیمه ییزو ارګانونو خپلواکه اداره وايي، د مراد علي مراد د پېژندنې مراسم ځنډول شوي او د بامیانو والي رسما خپله دنده پیل کړه.
بل پلو یو ځینو سرچینو شمشاد ته ویلي، د مراد علي مراد له ټاکل کېدو سره د ولسمشر سلاکار محمد محقق مخالفت کړی او دا پرېکړه یې دوه اړخیزه نه ده بللې.
د مشرانو جرګې غړي نیوکه کوي،چې حکومت دې له خپلو پرېکړو نه پر شاه کېږي او فشارونو ته دې نه تسلیم کېږي.
د مشرانو جرګې د دفاعي کمېسیون مشر هاشم الکوزی وايي:« پر حکومت د طالبانو کړۍ راتنګه شوې او د خپلو ګتو لپاره هغه کسان ټاکي،چې خپل ځان پرې وساتي او خپلې شخصي ګټې خوندي کړي.»
اخوا د سیاسي چارو یوشمېر شنونکی سید قیاص سعدي بیا وايي، د مراد علي مراد د ټاکل کېدو مخالفتونه د دې لپاره دي،چې د حکومت ضد وسله والو ملاټر یې کړی او حکومت یې ننګولی دی.
سعیدي زیاته کړه:« پر ارګ حاکمه کړۍ تل هغه څوک ټاکي،چې د نظام، حکومت او جغرافیه ضد وي او مراد علي مراد په وروستیو کې د حکومت پر ضد راپورته شو او د هغه شخص ملاټر یې وکړ، چې د افغان ځواکونو چورلکه یې وېشتلې ده.»
دا لومړی ځل نه دی،چې حکومت تر خپلې پرېکړې پر شاه کېږي، له مراد علي مراد وړاندې محمد داود چې د سیمه ییزو ارګانونو له خوا د فاریاب والي ټاکل شوی وو، د جنبش ګوند د پلویانو له سخت مخالفت سره مخ شو او اجازه ورنه کړل شوه،چې کار ته دوام ورکړي او بالاخره د غزني والي وټاکل شو.
