چین له شانګهای سازمان غوښتي، چې امریکا ته د دې اجازه ورنه کړي، چې د افغانستان ستونزه د نورو په غاړه کې ور واچوي.
د چین د بهرنیو چارو وزیر وانګ یي ویلي، امریکا ځان باسي او د افغانستان ستونزې د نورو په غاړه کې ور اچوي.
وانګ یي ویلي، امریکا په افغانستان کې جنګ پیل کړی او اوس نه شي کولی، چې پښې سپکې کړي او مسؤلیت د سیمې هېوادونو ته پرېږدي.
نوموړي ویلي، امریکا په دې وروستیو کې د افغانستان د سولې او ثبات لپاره تیاری نیولی او هر لوری باید هڅه وکړي، چې خپلې ژمنې عملي کړي.
په ورته وخت کې، د چین بهرنیو چارو وزیر له خپل افغان سیال محمد حنیف اتمر سره لیدنه کې ویلي، سیاسي بهیر کې د شاملېدو او د جګړې بندول د طالبانو لپاره ستر ازمېښت دی.
د واناګ یي په وینا، چین د افغان سولې کلک ملاتړی دی او هڅه کوي افغانستان ته د دایمی سولې راتګ کې همکاري زیاته کړي.
محمد حنیف اتمر بیا ویلي، افغانستان کې روانه جګړه باید د خبرو له لارې حل شي او په دې برخه کې د سیمې هېوادونو رول مهم او اغیزناک دی.
اتمر له خپل چینايي سیال سره د تاجکستان پلازمېنې دوشنبې کې لیدلي دي.
