د امریکا استازو جرګې د بهرنیو اړیکو کمېټې یو ځل بیا د دې هېواد بهرنیو چارو وزیر انټوني بلېنکن د افغانستان په اړه احضار کړی.
د یادې کمېټې غړو ویلي، بلېنکن باید خپل ولس ته له افغانستانه د امریکایي ځواکونو د وتلو په تړاو وضاحت ورکړي.
که څه هم بلېنکن د استازو جرګې وضاحت ته حاضر شوی نه دی، خو د استازو جرګې د بهرنیو اړیکو کمېټې ریيس مایکل مککال د احضار په مکتوب کې ویلي، که نوموړی په ټاکلې نېټه دې کمېټې ته حاضر نه شي، نو استازو جرګې ته به په سپکاوي تورن شي.
مککال زیاته کړې:« د امریکا بهرنیو چارو وزیر انټوني بلېنکن د ۲۰۲۱ کال په اګست کې له افغانستانه د امریکايي سرتېرو د وتلو په اړه د توضېحاتو لپاره دې کمېټې ته نه دی حاضر شوی. بلېنکن که د سپټمبر پر ۱۹مه د کمېټې په وړاندې خبرو ته یو ځل بیا حاضر نه شي، نو جرګې ته به په سپکاوي تورن شي.»
بله خوا، د امریکا د بهرنیو چارو وزارت ویلي، بلېنکن په هغو نېټه وخت نه درلود چې د استازو جرګې له خوا ورغوښتل شوی و، باید یو بل مناسب فرصت ورته وټاکل شي.
د دغه وزارت وياند زیاته کړې، بلېنکن د دې موضوع په اړه د توضېحاتو لپاره څه باندې ۱۴ ځلې د استازو جرګې بهرنیو اړیکو کمېټې ته حاضر شوی.
د سیاسي چارو شنونکي بیا وایي، په امریکا کې دننه لاهم ډېر داسې خلک شته چې له افغانستانه د امریکایي ځواکونه د وتلو پر پروسې نه دي خبر او په خبره يې د امریکا استازو جرګه غواړي، خلکو ته په دې اړه له امریکایي چارواکو وضاحت وغواړي.
د سیاسي چارو شنونکی سید بلال احمد فاطمي وايي: «په داسې حال کې چې ټولو ته مالومه ده، له افغانستانه د وتلو اسناد د ډونالډ ټرمپ په وخت کې جوړ شول، هوکړه لیک چمتو او پروسه بشپړه شوه؛ یوازې لاسلیک پرې بایډن وکړ. خو اوس د دې هرڅه پړه پر ډیموکراټانو اچول کېږي،ترڅو سیاسي ګټه ترې پورته کړي، نه دا چې افغانستان یا نړیوال سیاست ته ګټه ورسوي.»
په امریکا کې د راروانې نومبر میاشتې د ولسمشريزو ټاکنو په درشل کې له افغانستان د امریکايي ځواکونو د وتلو مساله یو ځل بیا توده شوې ده او کارپوهان په دې اړه تاوده بحثونه د ټاکنو تر پروسې پورې محدود بولي او په خبره يې له هغې وروسته د افغانستان په تړاو بحثونه ښايي څنډې ته شي.
د سیاسي چارو شنونکی خلیل احمد نادم وايي: « د افغانستان او له افغانستانه د امریکايي ځواکونو د وتلو په اړه د امریکايي چارواکو څرګندونې یوازې تبلیغاتي او ټاکنیز کمپاین دی. دا څرګندونې د افغانستان له سپکاوي پرته بل هېڅ ګټه نه لري.»
له افغانستانه د امریکایي ځواکونو د وتلو موضوع د امریکا په ټاکنیزو کمپاینونو کې تر ټولو توده مساله ده، دواړه ډيموکراټان او جهوریت غوښتونکي په دې اړه پر يوه او بل توندې نيوکې کوي.
