د افغانستان بهرنیو چارو وزیر محمد حنیف اتمر، چې تاجکستان ته د شانګهای همکاریو سازمان ناسته کې د ګډون لپاره تللی،له خپل ازبکستاني، پاکستاني او هندي سيالانو سره یې د ناستې له پيل وړاندې کتلي دي.
د بهرنيو چارو وزارت ویاند ګران هېواد وايي، په دې لېدنو کې د افغانستان سولې، تاوتريخوالي په کموالي او سولې ته د رسېدو برخه کې د هېوادونو پر ملاتړ او همکارۍ بحثونه شوي دي.
هغه وايي، یادو هېوادونو په افغانستان کې روان تاوتریخوالی غندلی، د افغانستان ثبات یې د سیمې ثبات بللی او افغان سیال ته یې ډاډ ورکړی چې د یو باثباته افغانستان ملاتړ کوي.
هېواد زیاته کړه:« د دې ناستې په څنډه کې بهرنيو چارو وزير تر ننه پورې، د ازبکستان، پاکستان او هند د بهرنيو چارو له وزيرانو سره کتلي دي، چې د سولې پروسې، تاوتريخوالي کموالي او سولې پروسې ملاتړ لا پياوړتيا په موخه يې خبرې کړې دي.»
ګران هېواد وايي، د چهارشنبې ورځې په ناسته کې د پاکستان بهرنيو چارو وزير شاه محمود قريشي د افغانستان بې ثباتي د سیمې بې ثباتي وبلله او د بهرنیو چارو وزیر ته یې د یوه باثباته افغانستان څخه د ملاتړ او همکاریو د دوام ډاډ ورکړ.
هغه زیاته کړه،دغو هېوادونو د افغانستان د سولې له روان بهير ملاتړ کړی او همدا راز يې روان تاوتريخوالی غندلی دی.
ګران هېواد وايي:« د درې واړو هېوادونو وزيرانو د هېواد د بهرنيو چارو وزير سره په بېلابېلو ناستو کې افغانستان کې روان تاوتريخوالي غندلی او بهرنيو چارو وزير ته يې د سولې پروسه کې له خپل ملاتړ ډاډ ورکړی دی.»
د شانګهای همکاریو سازمان څلورمه ناسته چې د تاجکستان په کوربتوب د پنجشنبې به ورځ دایرېږي، د افغانستان غړیتوب سربېره، د افغانستان پر روان وضعیت،د سیمې پر ثبات او ترهګرۍ سره د یاد سازمان د غړو هېوادونو پر ګډې مبارزې او همکارۍ دوه ورځې بحثونه وشي.