د افغان سولې لپاره د امریکا بهرنیو چارو وزارت ځانګړي استازي زلمي خلیل زاد د جولای په ۱۵ مه یوې غونډه کې د ګډون لپاره تاشکند ته له تللو وړاندې په دوحه کې یې له افغان مرکچي ډلې او د طالبانو له پلاوي سره لېدنې کړي دي.
تراوسه پورې د دې لیدنو مالومات رسنیز شوي نه دي،چې په دې اساس وخت کې د سولې په اړه کوم پرمختګونه شوي،چې پر اساس یې کېدای شي افغانستان کې د جګړې تاو واړوي.
بل پلو په قطر کې د طالبانو سیاسي دفتر ویاند نعیم وردګ وایي، مقابل لوري سره هم ناستې روانې دي، خو داسې څه نه شته،چې له مطبوعاتو سره یې شریک کړي.
وردګ زیاته کړه:«مجلسونه شوي او مقابل لوري سره هم ناستې روانې دي البته داسې خاص شی چې هغه له مطبوعاتو سره شریک شي، نه شته دي.»
په دوحه کې د طالبانو او افغان حکومت د پلاوو ترمنځ د پردې ترشا هم بحثونه پیل شوي، خو مالومات یې تراوسه پورې رسنیز نه دي.
د سولې په چارو کې د دولت وزارت وایي، خلیل زاد سره د دوی په لېدنه کې د سولې پروسې په ستونزو او دغه راز د مذاکراتو پر چټکتیا خبرې شوي دي.
خو د سیاسي چارو یو شمېر ویس ناصري بیا وایي،امریکا له طالبانو او پاکستان سره پټې ناستې روانې کړي او د خلیل زاد ټولې هڅې د دوی له وتلو وروسته د امریکا د خوندیتوب لپاره دي.
ناصري زیاتوي:« د سولې په اړه د خلیل زاد ژمنې چې هغه د جګړې،تاوتریخوالي، اوربند او سیاسي توافق او نوي حکومت تشکیل دی، هېڅ ګام نه ده پورته شوی. هر سفر او اړیکه یې اوضاع پېچلې کړې ده. خلیل زاد له طالبانو او پاکستان سره پټې اړیکې لري،چې د افغانستان راتلونکي او طالبانو حاکمیت لپاره دي. یوازې دنده یې دا ده،چې له پاکستان او قطر تعهد واخلي،چې امریکا ته راتلونکې کې ګواښ جوړ نه شي.»
د افغان سولې لپاره د امریکا ځانګړي استازي داسې مهال په نوي سفر راوتلی او مرکچي ډلو سره یې کتلي،چې تمه ده قطر ته د پخواني ولسمشر حامد کرزي او د ملي روغې جوړې عالي شورا پر مشرۍ د سیاسیونو یو پلاوی دوحې ته ولاړ شي.
طالبانو د سولې خبرو اترو په درشل کې ایران، روسې او ازبکستان ته سفرونه وکړل او موخه یې د دوو هېوادونو ترمنځ اړیکې او د سولې پروسه وه.
